یا شوگ الوکت شنهی الاعذوبه البیک شو حتّی الصخر بحروفک اتذوبه

واظن تگلب دلیل الصدک من ابعید مثل ما خیبره بچفوفک اتگلبه

وچم عاقل تسودن وابمحبتک هام وعاین بالضلوع وما وجد گلبه

لن شاف الدلیل امعرّج المثواک وساجد علی اعتابک یمسح التربه

واشگد سال دمع العین کلّه اعلیک وچی دمعک خفیف اخدودها اتشربه

یا غصن الحیات العجّبیت الفوس بس یا فاس یگدر غصنک ایحطبه

ویا صارم یبترک وانته البتار وچی بتار یمک تنحنی الرگبه

وچی عزمک رواسی عیب همّک ریح ولا بیتک گصب والعاصفه اتخربه

وچی انته النخل وامحمّل القنطار غم رایه الیقیسک یا علی ابغربه

سماها انته وخصالک مثل نجم اسهیل وبحّار الیتبعک ما خطا ابدربه

یا معنه العداله وچفک المیزان یا چف الخؤون الراید ایغلبه

لا متنه الأعادی ابکثر ما نهواک ابکثر حبنه الجنابک غیظها انشربه

وخلّونه حطب واشعلوا بینه النار ظنّوا ننتهی ونتراجع ابضربه

ما ظنّوا برد وانته ابلهیب الصیف واذا تبرد تقبّل چفک الحطبه

وذرّونه رمل بحضان ریح الشر ورادوا کون نهوی العار وانرکبه

وعمینه اعیونهم واقبضنه روح الموت وبعبار الرگب لو تآمر انصلبه

ولعیونک یحیدر نشد روح ابروح وبجدام المنایه اندوسها الصعبه

یا نفس النبی والمصطفی لولاک ما بلّغ رساله ولا نجح حربه

وعفیه اشگد هواک الگلب یا کرار وگلب اللی عشگ یتولّع ابحبه

چنت آنه جنین وبالرحم محبوس واتغذّه ابمحبتک بعد واتربه

لچن من گامت امّی انهضت عالرجلین لن تندب علی وتتعادل الرکبه

وعجیبه اشما ذکرتک غرگت اعیونی ودم صارت علیک المدمع اتصبه

مدری الشوگ مدری الممحنتک مولای وانته ابموطنک متحمّل الغربه

وکابرت اشکثر ویّه الزمن والبین یقرآن الثقافه البلّغ الربه

ویا صدر الرحب چم عبره کبرت بیک وچم مکروب حشّم واکشفت کربه

بس همّک یحیدر عادل الایام وابجرحک زمانک خنجره امجربه