ياشعر يوصل الك يالعسكري وبيش اقيسك وانته اكبر من قياسي

جدك السجدوله بامر الله الجميع يعني واجب من أدنك اليوم راسي

ياسفينة شوك مرساك الضمير كلبي مرسى ومو مثل كل المراسي

ماسة انته ودرة يانور الاله ومنهو يملك ماسة تتعالى اعله ماسي

فدوة الك ياسيدي ولأسمك نروح انه واهلي وفدوة الك كل هاي ناسي

انته حجة الله وامامي وبالضمير وانته منقذ سيدي بيوم انتكاسي

ابعالم الذر سيدي ومو هالزمان الله هو الكلي اتخذك سياسي

يا زعيم ويا رئيس بلا نقاش انته عاللوح انكتب حكمك رئاسي

والكراسي الالكم بعرش الاله بيده جبرائيل جاباهه الكراسي

منهو غيرك التمس منه الرجاء وياهو غيرك يقبل بهذا التماسي

سيدي ورغم الالم رغم الهموم وبرغم ذيج المصاعب والمآسي

شفت حبكم سيدي اساس الحياة وثبتت يالعسكري بحبك اساسي