هاك اخذ منّي العهد حتى المنيّه ما أعوفك لا و حگ ضلع ضلع الزچيّه

يالتناشدني على ديني او يقيني

جعفري اوإيماني واضح من جبيني

ما أغيّر منهجي او باقي ابيَمِني

قِبلتي حيدر علي و الزهره ديني

او لو يخلّون الشمس ما بين إديّه ما أعوفك لا و حگ ضلع ضلع الزچيّه

ما أعوفك لا و حگ جرحك يكرار

و اعتقادي ابهذا صاير يا حِمه الجار

ما يطبّ النار شيعي بسْمك انجار

و انت يا حيدر قسيم الجنّه و النار

حتى بجْهنّم إذا تحكم عليّه ما أعوفك لا و حگ ضلع ضلع الزچيّه

هاك اخذ من المُحب جوهر كلامه

بالرسول او عترته صار اعتصامه

بالحشر كلمن يدوّر عن إمامه

و احنا ويّانا علي ابيوم القيامه

او بالقيامه ندخل الجنّه سويّه ما أعوفك لا و حگ ضلع ضلع الزچيّه

تشهد ابفضلك يحيدر كل الاصحاب

إنك افضلهم صرت يا داحي الباب

و الذي عنّك سألنا يسمع اجواب :

حيدر الدُر و الذهب و الباقي اتراب

او لنّك أفضل يا علي منّ البقيّه ما أعوفك لا و حگ ضلع ضلع الزچيّه

يا علي إنت الولي و الباري شاهد

ما يضدّك إلا كافر لو مُعاند

و اللي عاند نهْجك اعليمن يعاند؟

خلّه من الجابته ايروح او يناشد

او لنّه طاهر موْلدي او نفسي أبيّه ما أعوفك لا و حگ ضلع ضلع الزچيّه

اسأل الله هالعشگ بيّه يديمه

و اسأله ايتمّم عليْ فضله او نعيمه

حين يجزي والدي او أمّي العظيمه

هُمّه ربّوني على الفطره السليمه

او فِطْرتي تعني الولايه الحيدريّه ما أعوفك لا و حگ ضلع ضلع الزچيّه

يا علي مثلك فلا أبداً يلاگون

لو على كلّ البشر گاموْا يدوْرون

و انت بن عمّ الرسول او سيّد الكون

او منّه صرْت ابمنزلة من موسى هارون

يا أخو الهادي او ابن عمّه او وصيّه ما أعوفك لا و حگ ضلع ضلع الزچيّه