كل أنواع الخليقة ذلت الخير الورى و الكواكب و العوالم بالإشارة امسيره

تعرف انكم معدن الرحمة واهل بيت النبي او قرّت الكم بالولاية وهاذي ليها مفخره

و انتو عنوان الوجود او مصدر الكل الحِسِنْ او ما بگى عالي ابعلوّه إلا قّر ابمصدره

بس أظنها الخيل تجهل منهو طايح بالشمس او منهو هذا اللي عليه اتجول گامت بالعرى

والله يا خيل الظلومة ريت تدرين الخبر منهو هذا اللي گُبَالج و العظامه امكسّره

چان ما جلتي على صدر الحسين او عالظهر او چان ما بللتي رجلچ من مسافح منحره

و چان ما ظلت سُكينه ابليل أظلم تلتفت اوبين الأجساد السليبه بالطفوف اتدوّره

اتدوره او شنهو التشوفه حين توصل مصرعه سرجه طايح عالترايب , يمه طايح خنصره

او چان زينب ما اطلعت من الخدور اتناشده خوية لحّگ حرّگو ذيچ الخيام الطاهره

ما دريتي اشلون فزّيتي نساوين النبي حين صارت بالعباية النار بيها اموجره

خويه بعدك بالبراري هايمه او دمعي يصب يندبك مره او ينادي مره سبع الگنطره

صدت الوادي الغري نادت يحمّاي الحمى وينه حلال المشاكل عودي شنهو الأخره ؟

طلعن الصوب المعاره ابلا قناع او لا ستر و إنتي يا خيل التلحگين النساء الحايره

چم طفل مذبوح عطشان او تدوسينه بجهل و ابعجاج الحافر اطرافة الصغيره امعفره

آه يا خيل او أنشدچ شنهو ردچ شالعذر هذا ريحانة محمد , هذا ضنوة حيدره

چي تحملتي الوضع ويلچ يخيل النايبة عالأرض واگع إمامج راضية لو ناكره ؟