هاذي ليالي امْحرمّك عادت علينه و احنا ابعزانا انواسي الزهره الحزينه

بأوّل مُحرّم هالعهد يتجدّد اوياك نقسم قسَم يبن الوديعه ابحرمة ادماك

خِدامك او طول العُمر نبگى على اهواك يشهد صدرنا باللطم و اچفوف ايدينه

و ابليلة الثاني عزانا ابْموكب احسين و اتظل نِسانا اتواسي بالنوح النساوين

و ثالث مُحرّم للعليله او أم لْبنين أو وي بشْر ابن حذلم ننادي امن المدينه

و ابليلة الرابع لعِدْ مُسلم إشاره حين اللي ذبّوْ جسمه من قصْر الإماره

و ابليلة الخامس دَمِع عيني التجارى لجْل الحَرَم حين اوْصلت بيها الضعينه

و ابليلة السادس يصير اهناك تذكار من نرفع ابْوسط العَزا راية الانصار

و اننادي يحسين اعتنينا او كلنا ثوّار و كل ثاير ابْهذا العَهَد صادق يقينه

و ابليلة السابع تهيّج بينا الاحساس لن صارت ابإسم البطل بو الفضل عبّاس

انهيم ابْذكر زوده او فِعاله او نرفع الراس و انْهبط الراس ابْذكر گطعة يمينه

و ابليلة الثامن گلبنه لْجاسم ايموع ما چّن مُهجنا الذايبه چَن هاذي الشموع

شيْهَوّد آلام الگلب ؟ شيْسكّن الروع ؟ لْعريس من دم الوريد امخضبّنه

و ابليلة التاسع مآتمنا الوفيه تنعى شبيه المصطفى خير البريه

حق الشباب اعلى الشباب ابهالمسيه او واجب عَلينه انعزيّ الهادي نبينه

و ابليلة العاشر فجيعه التشعب الروح من نذكر الطفل الذي بالنبله مذبوح

او فجرية العاشر حچينا ابصوت مبحوح لطْم او بچي او تطبير للي امطبّرينه

ما يخلص النوح او أظل دمعي أسيله لن ليلة الحادي عَشر سَبْي العقيله

نتذكر امصيبتها بالسَفره الطويله من عاشِر احسين او لعِد يوم اربعينه