نويت اكتب قصيدة بغيرة العباس لكني احترت بيش أبدي المطلع

وانا ادري القصيدة حسين يقراها و زينب حاضرة بالمحفل و تسمع

و أدري بالصدر جالس علي الكرار أمير المملكة و بعرشه يتربع

و كل بيت بذكر عباس من اقراه الزهرة تقول عيده و كرّر المقطع

أعيد البيت يالزهرة و على راسي خدامج أظل و لأمرج مطوّع

وسر قلبج يزهره الليلة بالافراح و بشعري البسيط أمسحلج المدمع

وسولفلج فعايل ابنج العباس برض المعركة و شسوى و شبدّع

رائع فعله ما اخلتفوا عليه اثنين و لأن منه صدر صار الفعل أروع

قمر عدنان ساعة مولده سموه لأن بالظلمة بس وجهه اللي يتشعشع

ثلثين الولد قالو على خاله كلابي الخال أصله و هاشمي المنبع

أم البنين أمه و عوده الكرار و اللي هذا أصله قلي و شيطلع ؟

صناعة الله بالعباس أظهرها , و تدري الله القدير و قدرته اشتصنع

ابماي الغيره عاجن طينته و سواه و من أفضل سلاله اختارها و نوّع

شوية حمزة و شويه من الطيار خلطها و البقية الفارس الأنزع

جمع كل الذمم و اودعها بالعباس لذلك زينب اخته بذمته اودع

مكفولة بخدر من الصغر بحماه و تدري بيا حضن كافلها يترعرع

ما حاجة و تنادي زينب العباس بس يرمش جفنها بو الفضل يفزع

الشمس رجعها إبإصبع او الحسنين و من نفس الصبع كان القمر يرضع

و طبايع عوده انتقلن مع الرضعة كرامة و تضحية ينقلهن الاصبع

إذن نفس الطبايع حيدر و عباس علي الطابع و شبله منه اتطّبع

غرس اوصافه كلها حيدر ابإبنه و ياما أوصاف كان امن المهد يزرع

زرع جفينه في زندين ابو فاضل و بطف كربله هذا الزرع أينع

قضّاي الحوائج هذه علتها لأنه بكف علي باب الدعا يقرع

أعني لو رفع جفينه بالدعوات جن باثنين حيدر للسما يرفع !!

مالوم التعجب منه و لو شاف جيش ابهالعدد من واحد اتضعضع

كثر ما لف بيها و فرفر الجيمان خضخضها و بقت بالجبد الملوع

أذن بيها بالطف حي على الميدان و خشعت من درت جاها اللي ما يخشع

اصفوف صفوف وقفت عنده مو خلفه و صلاها الجماعة بغير المشرع

شال السيف في تكبيرة الإحرام و هيّ قباله تهوي سُجدّا رُكّع

قلبها الدنيا عاليها اعلى سافلها و كسر خشم العنيد الما قبل يخضع

نزل يخطف بقايا الروح و الظلت و هي نصها اطلعت من شافته يطلع

رعد حسبوه من شافوا وميض السيف ومن شافو نظرته جالبرق تلمع

لجن عرفوا بأن الجايهم عباس لأن شافوه جاي امن الرعد أسرع

الردي حجّاي لونه في حمى ربعه يطول لسانه حتى القصته يلطع

أشو غص ابحجوته من تلاقى بيه الخزي والعار وي ريج الخجل يبلع

ججبها الزلم و بصرخة من عنده و اظن حتى الجبل من صرخته اتصدع

جر السيف .. و قص الراس بعد الراس لجن أول بدا بلسان المبلتع

يصير اثنين كل جسم النضربه بسيف وهو مدري بضَرْبته جي ينجسم أربع !!

كسر غمده و سيفه حده بالصوبين وعين اعداه من اجفانها شلّع

حلج الموت بشبع لو نسده بروح و حلج السيف نفنى وبعده ما يشبع

بياقوت و ذهب يترصع البتار وهو بالروس تزيّن سيفه و اترصع

هد مهره على وجه و يدل دربه نطاه الجود وقله للخيم إرجع

شغل عندي مع الفرسان أعلمها وادري بيها بس بالغلظة تتسنع

ذب السيف و عاري الايد ايلاحقهم تفر منه و هوّه بالجدم يتبع

ليش السيف ؟ ما رايد ثقيل ايصير كلمن يلزمه ابوسط النهر يدفع !!

وليش الخيل ؟ لأنه خطوته وسيعه ؟ مهو العباس خطوته من الافق أوسع

المهر ينراد للي رايد ايحارب وهو من كر شاهدها الحرب مرتع

و حتى السيف يحتاجه اللي يقطع بيه و هوّه بنظرته روس الزلم يقطع

أحلف بيش بأنه خالد و ما مات رغم الموت سقاه بكاسه و جرّع

و احلف بيش ما طاحن جفوفه اهناك ألف عباس من طيحتهن اتفرع

ومنهو القال تبدت جربته عالقاع ماي الجربه ويه الكوثر اتوزع

يسقي بجفه كل خدام خيه حسين و نهر الجود من نهر اللبن أنصع

يصف اوياك يوم الوحدك تبقى بيوم اللاندم لا توبتك تنفع

يصير هناك كالعادة مثل حيدر همن ساقي همّن شافع امشفع

هذا راي قولي و منطلق فعلي و اللي ما قنع كل عمره لا يقنع