و انعادت اعلينه المُصايب يا بقيع

يا بقيع الجامع الهَم و الأسى جينا بيك انعزّي أصحاب الكسا

من مُصابك عادت الحسره علينه

اوچنّه عاد اشما جرى ابأحمد نبينه

و چنّه گضى الليله النبي الهادي الشفيع و انعادت اعلينه المُصايب يا بقيع

يا بقيع او بيك ينصبّ الدمِع وابگبورك شاهَدت كسْر الضلِع

و الوديعه چنها هاليوم اعصروها

و ابْهدام القبّه چنهم سقّطوها

و چن محسن ابّاب الطُهر واگع صريع و انعادت اعلينه المُصايب يا بقيع

يا بقيع او بيك أفجع ذكريات او بيك حيدر منغدر وقت الصلاة

و چنّك انت المسجد اللي بيه تصوّب

و المصابك شيبه من دمّه تخضّب

و ابْهدمك اتصدّع ركن عزنا الرفيع و انعادت اعلينه المُصايب يا بقيع

يا بقيع او بيك ينعاد الزمَن ذكّرتنا ابْفاجعة سمّ الحسَن

و من نظرنا للگبر صرْحه تهدّم

چنه اردود الحسن چبده تخذم

و احنا جرعنا مثله للسمّ النقيع و انعادت اعلينه المُصايب يا بقيع

يا بقيع او بيك كل مؤمن حزين لنّه ينظر بيك مأساة الحُسين

و ابترابك چن أبو اليمّه تعفّر

و چنّه سورك خيمه بيها النار تسْعر

و چن صوّبك سهْم الذبَح ذاك الرضيع و انعادت اعلينه المُصايب يا بقيع

يا بقيع او بيك چن زينب سرت و چنها من هدْم القباب اتيسّرت

و كل حجَر من مرقدك عن موضعه انزاح

چنه ضربة اعلى المتن من چعْب لرماح

و السوط ايوَسّم زينب ابمرآى الجميع و انعادت اعلينه المُصايب يا بقيع

يا بقيع اليوم أنصب مأتمي و السبب : يوم البقيع عالمي

ثامن ابشوّال موعدنا ايتجدّد

الْعد ظهور المهدي من آل مُحمّد

حقك يعُود ابإيده او لا اتظن يضيع و انعادت اعلينه المُصايب يا بقيع