زينب على گبر النبي اتهل عالوجن مدمع حمَر

و اتگلّه جيتك و استمع منّي يجدي هالخَبر

يالهادي لو تدري اشجرى بعدك من الأمه اشسِدر

هذه ا لوديعه اُسترجعت إسألها يا خير البشر

إسألها عنهم بالإسم ياهو الذي اعليها جِسَر

او دار الرساله و الوحي اشلون ابحطب ناره استعر

إسأل من الجسم الذي باقي على متنه الأثر

إسأل صدرها ايجاوبك ضلع الذي بيه انكسر

إسأل يبو الزهرة من ال خد الذي ابگوّه انسطر

و اسأل قرطها ايخبّرك اشجاه او على الگاع انتثر

و الباب هذا و اسأله منهو الذي ابخلفه انعصر

و اسأل جنين اللي سگط اشذنب الجنى او دمّه انهدر

و اسألها عن حيدر علي و اشگد لجل دينك صُبر

جدّامه ضربوا فاطمه و الحيد ساكت ما نِهَر

حطّوا الحبل ابرگبته ليث الوغى او فارس مضر

مجبور گادوه العدى بَمْر الوصيه و انجبر

و اسألها شنهو الوصّته او ليش اللحد خفيه انحفر

او من يوم ماتت و الگبر مجهول او خافي اعلى النظر