مسلم مثال التضحيات

مُسْلم إِجَا لهْل الغدُر يحمل لوى الثّوْره

فارس غيُور امْن الزّغُر نَاصَرْ بَني الزّهره

وابصبْره خاض البين ..

وانْطَه النّفسْ لحسين ..

خَلْ تفهم ارْباب العقول عن مسلم اشْنحﭽي ونﮕول

زَمْ سِيفه واتحدّى المَهُول واتعنّى للكوفه رَسُول

ما ﭼانت الغايَه ينُول منصب يظل حُكْمه يطول

لنْ هُوّ فرْع امْن الأصول منْ حَيْدرَه وآل الرّسُول

صان الوفا طُول العمر واتْفانى للعتره

وهو التربّى اعلى الطّهُر نَاصَر بَني الزّهره

أصْله من الطّيْبين ..

وانْطَه النّفسْ لحسين ..

مُسْلم مثال التّضحيات والمثْلَه عالذّلْ مَا يبَات

ﮔابَلْ مصيره بالثّبات اولا همّته اجْيُوش الطّغاة

عاف النفس عاف الحياة واتوسّد ابحجْر الممات

مَيْمُوت ابَد طَيْب الصّفات يتْخَلّد ابﮕلْب الأُبَاة

واحنا ابﮕلبنا المنفطر نحييها هالذّكرى

مُسلمْ هِدَانا وبالصّبُر نَاصَر بَني الزّهره

مثل الجَبلْ مَيْلين ..

وانْطَه النّفسْ لحسين ..

من زُغْره ﭼان ابهالفعال مَضْرب مثَلْ لهْل المقَال

فَارسْ غيور ومَا تِزال تتّخْذه هالدنيا مثَال

شَبّ واتحلّى ابهالخِصال يشبه علي فَخْر الرجَال

ثابتْ مثِل رُوس الجبال من يدخل ابسُوح النِّزال

مُسلم تربّى اعْلَى الفخر واتْسَامى من زُغره

يشبه عليْ فارس مضر نَاصَر بَني الزّهره

وارث ابو السبطين ..

وانْطَه النّفسْ لحسين ..

ﭼنّه الصّميده من يثور وظلْ يحصد ابسيفه الشُّرور

وابكلْ حرُبْ صقْر الصّقور تتْهَيّبَه كل الطيور

حيدر ولينه اشْﮕد غيور ومسلم حِمَل نفْس الشّعور

يتصَدّى ﭼاللِّيث الهَصُور واﭼفوفه تتْماوَجْ بحور

حيدر جعَلْ منّه ذخُر لحْسين ابوالعتره

مثْل الﮕمر يمّ النّهر ناصَر بني الزهره

وامجندل الطّاغين ..

وانْطه النفس لحسين ..

راح وتعنّى ابهالمصير للكوفه واتقدّمْ سَفير

راح ابأمَلْ يطْوِي المسير مَا فكّر الوحْده يصِير

حَايِر غدَا ومَامِنْ مُجيرْ ولَنْ ترصدَه اعيون الأمير

ﭼم فاجر وﭼمّ منْ أجير لنّ اغدَره واصْبح أسير

يا وسفه جابُوه الﮕصُر واتلوّع ابأسْره

فارس يظل رغْم الغدُر ناصَر بني الزهره

وابدمّه صَان الدِّينْ ..

وانْطه النفس لحسين ..