آهات ليل الغربه دمعات ليل الغربه

تسألك فاطمه بنتك المهمومه يبويه من كلام الناس مهضومه

عجب كل فاطمه مكسوره مظلومه إبمصيبة فاطمه الزهره يذكرونك

إذا بنتك تسألك تكثر الونه صدق بويه كلام اللي أسمعنه

إحنه إبلا عشيره و لا أهل إلنه يبويه إبها السؤال أدري يجرحونك

لمن لحظات موتك قربت حسيت ردت كل الهواشم حاضره إتمنيت

وصيتك فاجعه يالغالي من وصيت توصي إبفاطمه و كلهم يسمعونك

يجدها للمدينه إتروح وياها تندل الدرب أمشي إويه ممشاها

تروح الدار أمي و أمي برجاها أمانه إبيدك و أهلي يجازونك

وصلت للمدينه فاطمه وصلت و شمت ريحتك و الوالده حنت

شبكتها يويلي و صاحت وونت ماتت ما تعيش الوالده إبدونك

يعقوب إبقميص إبنه رجع شوفه و أمك ماتت إعله الطفله ملهوفه

أم التنتظر غياب معروفه و من إدموع بنتك عرفت إشلونك

قضه عمرك غريب إبجمرة إمصابك حلم جان الحلم بس شوفت أحبابك

هاي أحباب إلك وقفوا على بابك إجوا من كل كتر يمك يزرونك

إجيناك و نحس إبجمرة الغربه عرفنه اليبتعد عن الوطن صعبه

إجينه إنطوف قبرك و الدمع لبه وين إعداك يالقاسم يشوفونك