دمع الحيران .. يروي الاحزان .. وين الاوطان .. يا ساقي الماي

يسأل عليك منين .. علمنه أهلك وين .. يا ساقي الماي

يلي تريد تناشده..موسى بن جعفر والده..تاج المكارم عنده

حملة أبادة ضالمه..ضد حيدر و ضد فاطمه..و الحاقد أعلن حقده

من بني الزهرة ما صفه ..اللي أنذبح و اللي أختفه..كل فرد عاش ابلده

و القاسم يدير النظر ..قرر بعد ذاك الخطر ..يترك مدينة جده

جرح المحتار .. يترك آثار .. تسكن يا دار .. يا ساقي الماي

حاير تدير العين .. علمنا أهلك وين .. يا ساقي الماي

من موطن أجداده أرتحل ..عاف الحبايب و الاهل ..لأرض العراق اتعنه

ما يندل امنين الدرب..و المثله يتغرب صعب ..إلمن يسولف حزنه

بعيونه ينشاف الدمع ..مكسور خاطر منفجع ..و الخطوة حسرة وونه

وحده صفا و حن القلب..ما ينحمل دمع الغرب ..يشوف الاهل يتمنه

وحدك ظليت .. تمشي إليا بيت .. لأهلك حنيت .. يا ساقي الماي

نار الغرب نارين .. علمنا أهلك وين .. يا ساقي الماي

للبير إجه و من شافته ..بنت الكرام أتلقته..شافت الغيرة بدمه

أهلاً وسهلاً حييته..و الدار أبوها جابته ..طبع الكرام تكرمه

بعد الضيافة ينسأل ..عن اسمه و أمنين الأصل ..لازم يغير أسمه

أسمه الغريب و للأسف ..تتخفه أعلام الشرف..من ظلم هاي الأمةه

صرت السقاي .. و الحكمة بهاي .. تبجي على الماي .. يا ساقي الماي

تذكر مصاب حسين .. علمنا اهلك وين .. يا ساقي الماي

فعله فعل طيب نسب ..بيه سيد القوم أنعجب ..قرر يزوجه بنته

أصبح له بيت و عايله ..و يتمنه بس شوفة هله ..جلمة وطن جارحته

بس طفلة عنده بدنيته ..صارت حياته و سلوته ..و يقلها نرجع يمته

من ينظر الطفلة يون ..ما ينمسح دمع الحزن..يبجي و يون بسكته

قلب الملوم .. يفرح يا يوم .. ما ترجع دوم .. يا ساقي الماي

يالعاشرت جرحين .. علمنا أهلك وين .. يا ساقي الماي

من حس منيته قربت..الطفلة نادها و إجت..علمها اسمه و سره

يا بوي جبري خاطري ..لأرض المدينة سافري..أمي إلج منتظرةه

لو شافتج يا مدللة..يا ريحة القاسم هله و تموت من الحسره

شميها يا بويه إلي ..و شمي لي كل ريحة هلي ..شيطفي هاي الجمره

بعد الغياب .. ظلت على الباب .. ما ظل أحباب .. يا ساقي الماي

يلي إجاك البين .. علمنا أهلك وين .. يا ساقي الماي