من إتزور قبر الكاظم...إنشد وين قصر الظالم

يا هو الشعت أنواره...يا هو الضاعت آثاره...إنشد وين قصر الظالم

لمن تعتني للكاظم إتزوره...إقبالك تنرسم عن المجد صوره

دار أهل الشرف كل وكت معموره...وين الطاغيه و أزلامه و إقصوره

عاين زين و إخذ العبره...للمظلوم و إدرس صبره

هارون الظلم وينه...خاسر دنيته و دينه...إنشد وين قصر الظالم

وينه اللي يخاطب كل سحابه اتمر...تتمطر فوق ملكي وين ما تمطر

جم فرعون قبله الجان متجبر...فك عينه الصبح لن ملكه متذمر

بالمرصاد رب القدره...جم طاغوت هدم قصره

و الما تعصي باريها...هيبه و عزه ينطيها...إنشد وين قصر الظالم

بالسيف اليظن الناس تتغير...هذا اكبر جهول و داعيه للشر

تعال و شوف تقوت موسه بن جعفر...من عقر السجن بالوادم اشأثر

هذا الجان زاهد عابد...يهدي الناس ذكره الخالد

كاظم غيظه بحسانه...و أصبح نوره عنوانه...إنشد وين قصر الظالم

ابغير النزله الباري الذي يحكمون...خل يصير عبره إلهم حكم هارون

و القضه حياته امعذب و مسجون...اشحصل من كرامه خلهم يشوفون

كل محتاج يطرق بابه...ابساع اينال رد إجوابه

الباب الكاظم إتعنه...ينطي اشما ردت منه...إنشد وين قصر الظالم

من هذا الشعور الصادق التعبير...صاحت شيعته يا زمرة التكفير

للكاظم نقصده اشما يريد ايصير...نتحده ابعقيده قوة التفجير

جينه إنصيح احنه إتباعه...عدنه الدين حب و طاعه

نرفض مبدأ الذله...بالإيمان نتحله...إنشد وين قصر الظالم

من سيرة أهل بيت النبي إحنه...أخذنه ادروس عزه ابساعة المحنه

و جم ظالم الطاح و إحنه ما طحنه...مثل صيحة حسين ابكربله صحنه

لا هيهات من ذلتنه...موت انريد بيه عزتنه

وكت الشده ما ندبر...من أجل الشرف نصبر

باجر نلتقي اويه اعدانه بالمحشر...و يا عذر الينفعه القصده يتعذر

من يم الصميده باجر المعبر...يطيح امن الصراط الما يحب حيدر

عالمعبار نلقه الزهره...و إحنه ابراس عالي إنعبره

حامي الجار يروينه...كوثر صافي يسقينه...إنشد وين قصر الظالم