بعد السجن يوسف حكمها المصر و الكاظم أصبح حاكم إبكل عصر

هالبحث عالي الصفحه بيه تستجل هالبحث برهان و دليل و فصل

بيه حاجج العنده علم و الطفل بالك تدانيه إبحديث الفكر

يوسف و ابن جعفر قمم شامخه ظلت سلاطين الظلم راضخه

إلهم مواقف بالدهر صارخه إلهم ثبات و مصدره فذ جذر

الضاع بغياهيب السجن يكتشف غير السجين يظلمه لمن يصف

الطاموره أشبه ما تكون ابحتف تنوصف لو أصبح المدمع حبر

يوسف إذا يوصفه الموسه إبدمع ما نشعر إبحاجه الأداة السمع

إنشوف المشاعر عالوجه تنطبع نهرين من عين و قلب تنحدر

بأفق الخيال إتبلورة فكرتي خل أقصد اليعرف قدر دمعتي

ما دام يوسف عالم إبنيتي خل يملي و أنظم ما يقوله إبشعر

إوصلت القصر حاكم مصر و إدخلت حلقت بإحساسي إعله عرشه و طفت

ما بين قبطين البحث قارنت و أخفيته للحاصل إبجوف الصدر

ناشدني يوسف عن أصل مطلبي جاوبته قارن بين إمام و نبي

قال إبسؤالك لغز منه إشتبي أفصح أبن يا سائلي و إختصر

لخصت ما دار بإطار الدهن و إسألته عن مظلوم غاب إبسجن

صاح التقصده واحد و ما أظن الغير ابن جعفر بالمناشد تشر

خافت الصوت بإذني جاوب همس أسرار موسه من اسرار القدس

هالكون ما لمه يلمه حبس خليك واعي و فاهم و مقتدر

بتأويلي للطيف إشتهر لي اسم ظنيت ظن وانه أفسر حلم

و الكاظم إبذروة يقين و علم خلد معاجز ما أظن تندثر

سيّر ابن يقطين من البعد و أهلك المهدي من سمع بيه يعد

صاح بدعاء الجوشن الما يرد مظلوم إله من يرد له البشر

تهمت زيلخه جرعتني الألم الزنزانة عالم إسمه عالم عدم

ما شفت بالعالم بريء إنظلم مثل الغريب النعشه ظل عالجسر

آلامي بآلامه فلا تقترن فارقت أب و موسه فارق ابن

تصحه الهموم إبليل لمن يجن و شيجبر الخاطر لون ينكسر

لا تسأل أكثر عن وضع محنته أولاد موسه أعرف إبشدته

بهالكون ما حصلت مثل شيعته من عدهم إنت إقصدهم إشمنتظر

شديت رحلي و إعزمت عالسفر بغداد ما زالت محط النظر

بغداد قلعه و بيها أبشع صور و ما زالت إبشطرينها تنشطر

امن الكوخ أصوات الدعاء ترتفع امن القصر أنغام الطرب تنسمع

أحرار بسياط العبد تنقرع آمنه بدروب الشهاده النصر

دعوتنه بيها يستتب العدل دعوتنه متمثله إبفروع و أصل

نتمنه نثبت بالشدايد مثل موسه بن جعفر و الشهيد الصدر