مهمومة هالليلة الروح - ما تدري لا وين تروح

محتارة ما بين اثنين - قبر الرضا و قبر حسين

كظيم وروحي مذهولة على حال العترة تتألم

مرة على الرضا ومرة على أبو الأكبر تشيل الهم

واحد بأرض مشهد مات مسموم إنغدر بالسم

واحد جسمه بأرض الطف غسلوه بنجيع الدم

هذا الغريب المسموم - هذا الذبيح المظلوم

وانحفرن إلهم قبرين - قبر الرضا وقبر حسين

الحديث يقول من تزور حسين وتقصد لقبره

إلك يكتب إله الكون ألف حجة وألف عمره

هذا ابن الوديعة الي تغسل من دما نحره

انذبح جمب النهر عطشان ومنه شرب قطره

جالت على ضلوعه الخيل - تصرخ دموع الياويل

أرد احفر بجفن العين - قبر الرضا و قبر حسين

حديث الثاني كل من زار الرضا وللمرقد تعنى

الرضا يحضره بمخاض الموت وبيده تدخله الجنه

هذا الي قضى مسموم لونك ناشدت عنّه

لهيب مصابه ما تطفى لا دمعة ولا ونه

لمصيبته دموع تسيل - چم نايبة المهجة تشيل

مذهولة واحتارت بين - قبر الرضا وقبر حسين

حديثين اسمعت والروح بقت هاليوم محتاره

احتارت تنتحب إلمن وتحمل لوعته وناره

تروح تزور أبو السجاد وتزور الأخوة وانصاره

لو قبر الرضا تقصده وتزوره ويه زواره

من عيني العبرات - وبروحي نار الحسرات

محتارة تقصد لا وين - قبر الرضا وقبر حسين

تعنيت لأرض مشهد أزور المرقد الطاهر

أطوف بقبر أبو محمد وأواسيه بقلب شاجر

لن وحي القوافي يقول قاصد وين يا شاعر

حتى الرضا بهذا اليوم راح لكربلاء زاير

بالطف جميع الأملاك - هالليلة مجموعة هناك

بالدمعة حفرت جرحين - قبر الرضا وقبر حسين

أملاك ورسل هاليوم على قبر حسين مجتمعه

هذا على الضريح يحوم وهذا اليسفح الدمعه

أول زاير تعناه أمه فاطمة البضعه

تنوح على الي واساها بذبح طفله وكسر ضلعه

تبجي على صدره المهشوم - روح الرضا وياها تحوم

للزهراء راواها البين - قبر الرضا وقبر حسين

حزينة لعترة الهادي أواسي الزهراء و اتحسر

دمعتي دموم أجريها أواسي دم أبو الأكبر

وأروح لمشهد أتعنى بقلب ملهوف ومكدر

أحن على الرضا وقلبه الذي بسم العدا تفطر

عجبه الامام السلطان - يصبح غريب الأوطان

والشيعة بين مصابين - قبر الرضا وقبر حسين