بين الذبيح و بلا دفن .... بين الرهين وسط السجن

يا ما صحت .... يا ما نحت

عل المنذبح مظلوم

و اليوم أحن .... و أبدي الحزن

عل الكاظم المسموم

أكفكف دمعتي ابجفي و أصيح ابصيحة اللهفان

اعله هذا القدر و المكتوب صبراً يا بني عدنان

قضيتوا بالذبح و السم بين السيف و السجان

يا هو الما حزن الكم حتى الحزن هم حزنان

إلكم جسوم تنزف قهر .... إلكم سجون وحشه و قدر

يا لوعتي .... يا حسرتي

إلمن أبث اهموم

عالمنسلب .... لو أنتحب

عل الكاظم المسموم

يباريكم لطف ربنه و يصبركم إله الكون

لفتكم ناعيات البين يصيحن و القلب محزون

يا هاشم هذا راهبكم قضه نحبه ابسجن هارون

و آخر ما ورد عنه نعشه اعله الجسر مرهون

نعش الغريب ظل عالجسر .... وين الكماة أهل الذكر

ظل نرتجي .... يمتى تجي

و اتصبر المهموم

شفت النعش .... قلبي انخمش

عل الكاظم المسموم

تعنيت الجسر بغداد الموسه و احضرت عنده

شفت نعش الغريب اهناك رميه اعله الجسر وحده

اتذكرت جده الغريب احسين صريع بلا دفن جده

الكاظم نعشه مرمي و راد يواسي احسين من بعده

نار المصاب ما تنطفي .... بينه العذاب ما يكتفي

الكاظم قضه .... جمر الغضه

وسط الجبد مضروم

جفن الدهر .... دمعه انهمر

عل الكاظم المسموم

حموله ما إجت يمه عليكم تنشد الوادم

اشعجب لمن بده التشييع ما حضرت بني هاشم

قلت من ذبحوا المظلوم احسين ابشفرة الظالم

للطف ما إجت و اشلون تحضر دفنت الكاظم

هذا الغريب نعشه ارتمه .... محد لفاه بس فاطمه

الزهره اعتنت .... يمه و إجت

من المدينه اليوم

أم الحسن .... خلت جفن

عل الكاظم المسموم

هاي أم الحسن و احسين الدهر لوعات راواها

كل يوم ابإبن تنصاب تعيش ابضيم خلاها

اليوم اعتنت للكاظم تغسله ابدمع عيناها

كافور و سدر جابت و جابت جفن وياها

بنت الرسول تجري الدمع .... ذكرت مصاب كسر الضلع

ذكرت قهر .... قطع النحر

ذكرت ضحايه اجسوم

يم السجن .... قعدت تون

عل الكاظم المسموم

يم نعش الحسن حضرت تحن لجنازته و قبره

حضرت كربله و شافت احسين ايسيل دم نحره

و للسجاد و الباقر عله الصادق تهل عبره

و للكاظم إجت هاليوم تنوح و تنحب الزهره

اتشوف الحديد حز رقبته .... ظلت تنوح لجنازته

ابلهفة صبر .... أم الطهر

يم نعش إبنها اتحوم

امن الطاهره .... المدمع جره

عل الكاظم المسموم