ماينوصف يا بويه جرحك بمصاب نور السموات انحجب بيك وغاب

ماينوصف جرحك يبويه شألّم من طيحتك ركن العقيده اتهدم

حين النزف جرحك يحيدر بالدم ماضل گلب ما نزف ياداحي الباب

حين النزف گلب السماء تفطّر لو تدري يا باالحسن بيهه شأثر

جن وانس مفجوعه تصرخ حيدر وتگطعت كل السبل بالاسباب

وتگطعت يا بويه كل اوصالي ذاك الفجر ذبلت ورود امالي

وتغيّرت بالصدمه كل احوالي يرعد وجل يابويه گلبي المرتاب

يرعد وجل هيّج علّيه احزاني خلافك يحيدر گلي من يرعاني

يوم انهدم ركنك هوت اركاني مثل الملح يا بالحسن حيلي ذاب

يرعد وجل من خوفه فطّر چبدي ما ضل صبر صامد يبويه العندي

يهمل جفن من دم تحفّر خدي ضل الدمع من عيني يمطر سچّاب

ضل دمعي يجري وخدي ضل المخضوب حزني عله حيدر اشد من هم يعقوب

لابل اشد من يوسف ومن ايوب ارجف مثل سعفه واطگ ناب بناب

مثل السعف صرت وتشب بيّه النار جدراني طاحت والسگف كله انهار

جرحك غميج بروحي يا حامي الجار روحي انتهت بين الضلع والمحراب

روحي انتهت ما بينك ونحر احسين روحي انتهت من سهم الصوّب هالعين

روحي انتهت عالنهر طاحن چفين هذا الجرح ضل ملتهب لا ما طاب

هذا الجرح ضل ملتهب ما يلتام طول الدهر وشما تدور الايام

جرحي الاشد يوم اسحگت درب الشام روحي انتهت والضعن بيد الاجناب