(( شلون تتركني غريبة وإنت طاعون الحريبة؟!))

يوم تفخر حرمه بخوتها أني خويه أفخر بالشمس ويا الگمر

ياللي بسماته تكفكف دمعتي هذا دمي على خدي منحدر

ما تحاچيني يسور العايلة أظلمت دنياي يا نور البصر

يا بو فاضل ركبوني هازلة وانت نايم يالأخو جنب النهر

ما تشوف اعداك بيّا هازلة لو نسيت أنك كفيلي بالسفر؟

ترضى يابو الغيرة يحدي حرملة ناگتي او يشمت على حالي الشمر

(( ما ترجّعني لطيبة آني يا خوية الحبيبة))

أذكر أيام الطفولة يالأخو وانت في حجر الوصي تضحك إلي

ما أقاوم لهفتي وادنو ابعجل عطني عباس الشفية يا علي

وأحملك في صدري والثم وجنتك اوگلبي من نبضات گلبك يمتلي

كنت افاخر بيك كل عز اوفخر واصطفيتك يا حبيبي كافلي

او بس أمر ركن الديانة بالسفر سلّمت يمناك قبضة محملي

او تالي يابو الشيمة في ولية غرب تترك اختك حايرة ابليا ولي

(( ترضى يا كبش الكتيبة أبگى في حالة عصيبة؟!))

زينب ادموعچ تراها غالية لا تصبيها يخيّه محتمل

دمعچ اليجري على گلبي جمر منظرچ منّه ضلوعي تشتعل

إرفعي راسچ يمحبوبة علي ما تذلّي دام ابو فاضل عدل

إنتي من حيدر أمانة واصلة عيني حصنچ لا تخافي اشما حصل

ألزم الهودج عن اهموم الزمن حلمي لجلچ يا عقيلة أنجدل

طاعتچ عندي يزينب واجبة وأمريني بس تشوفين الفعل

(( حرصج اللي تلتجي به من تحل يختي مصيبة))

بس يزينب خوفي يمّ المشرعة أنجدل واتصيري ما بين الغرب

منّچ اترجّى العذر يمخدّره أتركچ للمحنة يا خيّه صعب

لو تشوفيني على شطّ النهر طايح او مني دماياتي تصب

أنظر ابعين الظُلامة للخبا وانظر الماي النهر بس بالگلب

مو سهم هذا اللي في عيني نشب هذا سهم الدهر في روحي نشب

إعذريني او لو تشوفي مصرعي تعذريني او ما تدرين العتب

(( عيني من دمي خضيبة جثتي ظلّت تريبة))