زينب و العباس (عليه السلام) عند مضايقة جيش الحر للقافلة

للشاعر: سلمان الكرّاني

من جيش الرياحي دار حول احسين و الأنصار زينب في ﮔلبها الخوف هاج او هيّج الأفكار

طلّت من خدرها اتشوف شاللي زاعج الأظعان ما تتحمّل الحورا تسمع ضجة النسوان

أو من شافت يويلي الجيش صاحت يا ﮔمر عدنان عينك عالعزيز احسين تدري ابهالزمن غدّار

مهي بالعادة يا عباس أشعر و انته يمّي ابخوف أو هذا الوكت مو عاشور و لا هذي أرض لطفوف

غريبة محملي مزعوج أو منّك سالمة لﭼفوف متنظر يا أبو فاضل محاملنا عليها اشصار

أشوف اعلينا دار الجيش و احنا ابأرض ميشومة يخوية لو نصبتوا خيام ﮔبل الحرب و الحومة

أخاف الحرم لو شافت دربها ابخيل مزحومة تضج او يرتفع لنياح منها او تدري عدنا اصغار

يخوية ما أريد احسين يدري ابخوفي و ابهمّي يكفيه اللي في ﮔلبه و انا اشبيدي على ابن امّي

تشاركت الصبر ويّاه حتى اسمه امتزج باسمي صرت من أنظر ابعينه أذكر أمي و الكرار

نزل عن مهره بو فاضل أو مد اﭼفوفه و اتبسم يريد ايسلّي خاطرها او يكشف عن ﮔلبها الهم

يزينب لو يصير الكون كله اجيوش ما أهتم و اذا خوفش على خدرش أخلي الليل ماله انهار

أنا العباس يزينب او سيفي الها الوكت مذخور أبد لا تذكرين الخوف و انا صارمي مشهور

أو حﮓ اللي انلطم خدها يخيّة او ضلعها المكسور لخلي الزمن يتذكر فعايل حيدر الكرار

غريبة او عندش العباس ويّه احسين و اتخافين مهو عندش خبر واعلوم وانتي العالمة او تدرين

يوم العاشر العباس لازم ينذبح و احسين يخيّة أو أعظم الأحزان في خدرش يشبوا النار

يزينب و العذر منش على اللي من بعدنا ايصير تفر النسوة و الأطفال من خيل الأعادي اتغير

أو بعد احسين و العباس تشوفي الغربة و التشهير أو من بعد الخدر و الصون زينب تظل دون اخمار