وداعه نسوته و عياله

رد ابن حيدر للمخيّم يكفكف دمعته وقف ما بين الخيم عزمه يودّع نسوته

يصيح يا زينب ابهالنّسوه و لَيتام اطلعي و بالعجل يمْخدره منّي تعالي اتودّعي

و قرّبي ليّه جوادي و شيّعيني المصرعي طلعت اتقود المهُر و الجبد منها امفتّته

نادته يا نور عيني شفت مثلي بالدّهر للمنيّه ماشي ابن امّي و ادنّي له المهر

قلبي امقاسي مصايب يالولي اتفتّ الصّخر خرّت اتوَدعه و بالمنحر يَويلي شمّته

فتح باعه للوديعه و ضمّها ضم الوداع صاح خويه وداعة الله و قلبها الذّايب ارتاع

غدت مدهوشه تضمّه الصدرها و الرّاي ضاع نادت اليوم الدّهر يحسين شملي شتّته

قال شفتي يا عزيزه مثل خيّج بالملا ذبحت انصاره طبق حتّى الطّفل ما ظل اله

و ينظر اولاده و اخوته بالتّراب امجَدّله‌ و الحرب شبّت لظى و العطش مض ابْمُهجته

و حال سكنه حال لَقشر يوم اجتّه اتودّعه تنتحب و تصيح عزّ الحرم ماشي المصرعه

سمعها اتنعّي و تحدّر فوق خدّه مدمعه و احتضن ذيج العزيزه و ظل يجذب حسرته

نوبٍ ايضمها الصدره و يجذب الحسره و ينوح و نوبٍ اتشمّه و تقلّه عقب عينك وين اروح

هذا طير اليتم يَمْشكّر على راسي يلوح و الحرم ضجّت على حالة سكينه و حالته

صاح يَسْكينه ترى نوحج عقب ذبحي يطول عقب عيني يا حزينه اتكابدين امرٍ مهول

تنظريني عْلَى الثّرى و الجسد ميدان الخيول و انتي حسره عْلى جمل تنحل القوه مشيته

نادته ماني العزيزه اللي تودني يا شهيد اشلون تتركني غريبه و الوطن عنّي بعيد

بويه ترضى غيرتك حسّر يودّونا اليزيد بين اعادي و العدو صعبه يَبويه وليته