استنهاض بني هاشم

يَولاد هاشم ما بقت منكُم بقيّه راحت حرايركم يسر بالغاضريّه

بالغاضريّه اتيسّرت ثوروا ادركوها هذي العدا للشّام مسبيّه خذوها

و شيخ العشيره اجنازته ما شيّعوها فوق التّرايب شيّعتها الاعوجيّه

و عبّاس يم المشرعه مقطوع لزنود وعدوانكم نكّسوا الرّايه ومزّقوا الجود

محّد رفع جسمه وظل بالتّرب ممدود ضاعت عقب عينه الحريم الهاشميّه

و شبّانكم جاسم و لَكبر بالثّرى انيام كلهم بلا تجهيز ظلّوا ثلثتيّام

و عدوانكم ساقوا الظّعينه ابذيج لَيتام حسّر على نوق و مدامعها جريّه

راحت حرايركم يسر يا اشبال عدنان فوق الهوازل و التسوق الظّعن عدوان

قطعت فيافي وراس عزها يلوح بسنان يسطع على الذّابل مثل شمس المضيّه

الكم يتامى تقطع البيدا على نوق و مخدّره اتنخّي الحادي ابدمع مدفوق

اتقلّه يحادي النّوق هزّل خفّف السّوق شوف اليتامى اتلوج ماعندك حميّه

الكم عليل امدامعه جرحت اخدوده و ابجامعه و اغلال مشدوده ازنوده

فوق الهزيله جرّحت ساقه اقيوده كلما يضربونه يون ونّه خفيّه