التجاء زينب بالسجاد بعد مصرع الحسين

فرّت ابْدَهشه مخدّرة حيدر الكرّار يم العليل تقول داقْعد وانظر اشصار

يبني الشّمس غابت وهذا الكون مرجوج و الجو مظلم والأرض ياسورنا تموج

وحسين عهدي بشوفته من لاح بالغوج والكون متعطّل واظن الفلك ما دار

اتحسّر وقلها بالبجا لا تهيّجيني قعدي ولعد صدرج ابراضه سنّديني

وكشفي السّتر يمخَدّره امن اقبال عيني امتثلت كلامه والقلب مشغول بافكار

دنّق وعاين للفضا وبطّل ونينه و هلّت ادموعه و اصفج اشماله بيمينه

قالت اشصاير قال يا عمّه انولينه هذا العزيز حسين متجدّل بالاوعار

طايح أبويه حسين والعالم غصب ماج غابت انواره ولا بقى للعالم اسراج

وان صدق ظنّي والدي محزوز الاوداج قومي يمحزونه استعدي الهتك الاسْتار

وصّاج ابويه حسين من بعده بلعيال و هذا كريمه تنظرينه فوق عسّال

وهسّه يعمّه الخيل تدهمنا و لرْجال قومي اجمعيهم لاتفر وحده بلا خمار

قومي يعمّه و ادركي النّسوه والايتام عندي ادخليهم و اتركوا باقي هلخيام

لحّد يظل بيها ترى العدوان ظلاّم معلوم من بعد النّهب تنضرم بالنّار

صرخت وفرّت والقلب بالحزن مجروح تنادي يتامى حسين تدْهشني عن النّوح

لو هجمت العسكر عليّه وين أنا اروح وين التجي بَيْتام اخوتي ازغار وكبار

كلّفني ابن امّي بيتاماه وعليله ما بين طفله مروّعه وحرمه ذليله

والا يتيم و يشعب الرّوح بعويله بليّا ولي والليل مجبل والعدا اشرار