على غرار السابقة

هاليوم ون حسين و الونّه خفيّه من ونّته ماجت طفوف الغاضريّه

وشمر الخنا من عاينه مغشي لفى له وصدرٍ حوى الاسرار من ربّ الجلاله

ياغيرة الله ابن الرّجس داسه بنعاله و فتّح اعيونه و انتبه شبل الزجيّه

قلّه اشمرادك قال قصدي حز راسك محّد جسر غيري على صدرك وداسك

راح القوى من عندك وشدة مراسك وانا الذي باجرّعك كاس المنيّه

قلّه السّبط ما جيتني بحومة الميدان وكت اشتعال الكون ومجادل الفرسان

وانا وحيد و فيّضت بالجثث وديان تلقى المنايا جان لو قربِت ليّه

قبل انجدل لو لحت ليّه يابن الاوغاد و اثبتت لي خلّيتك امعفّر بالاوهاد

العطش ماخذني و لمثلّث بلفّاد معلوم تتجاسر يبو الذّات الرّديّه

جدّي رسول الله وابويه فارس الكون وامّي الزّهرا نور عرش الله المكنون

وخيّي الحسن ياليتهم حالي يشوفون مطعون و اتلظّى على شربة اميّه

أريد قطرة ماي قبل اتحز نحري وخفّف الوطأه يازنيم اوهيت صدري

ظامي تذبحوني و هذا الماي يجري من جود جدّي و والدي ويحرم عليّه

للمعركه وصلت الحورا بالنّساوين حسّر ودلاّهن جواد حسين بحسين

شافن شمر يفري النّحر واهْوَن الصّوبين و انياحهن زلزل نواحي الغاضريّه

ضجّن فرد ضجّه ينور العين يحسين دقْعد احميها وصّلت ليك النّساوين

محد بقى يحمي يَبوسكنه الصواوين و زينب تصب الدّمع واتنادي شجيّه

حامي حمانا حسين لا تضيّع يتاماه جسمه موزّع والعَطش هالفتّت احشاه

وسكنه العزيزه تنتحب وتصيح ويلاه يا ضيعة ايتامك يبويه ابهالعشيّه

اسوَد الفضا وابن الخنا يهبّر بالاوداج واهتزت افلاك العليّه والعرش ماج

صرخن يَوَسْفَه راح ملجا كل محتاج حز الكريم و كبّر العسكر سَويّه

فرّن و مالت للمخيّم ذيج لجنود ساعة القشره اعلى الحرم ساعة الفرهود

داسوا يتامى وبعض منهم راحوا اشرود مايقدر الواصف يوصّف فعل اميّه