المستهل:

فدوه لحسين أربعتهم فدوه لحسين

كالت أمهم ناذرتهم فدوه لحسين

والنعم ام البنين هذا نهج الثائرين

فدوه لحسين

***

موقف الحرة الوفيه جان اعظم مفخره تستحق هاي المكانه اتكون زوجه الحيدره

قدّمت اربع ولدها دون ابن الطاهره هاي شيمة نبي مرسل أبد موشيمة مره

تنتظر كل هالسنين اوربّت إليوث العرين

فدوه لحسين

***

إنتي موبس أم عظيمه إنتي فعلاً مدرسه خرجّت للطف فدائي الكون كلّه ايقدّسه

بالحرب لو ذكروا اسمه ايخاف جيش الغطرسه قائد اويسقي العطاشه اوخدر زينب يحرسه

تشهد ابهاي العرب عالنهر بالدم كتب

فدوه لحسين

***

حكّه حيدر من يدّور عن نسب بت الاصول رادها جلده اوتقيه او حرّه ولد تها الفحول

وكفت ابيوم الشدايد موقف ايحير العقول يا مره النذرت نذرها اويامره التوكف تكول

لو بعد عندي اربعه مثل سبع المشرعه

فدوه لحسين

***

عدْ نساء الدنيه كلها حيل صعبه المسأله للمنيه اتودّع إبنها هاي أكبر معضله

لكن ام عباس رادت توصل اليامنزله صمّمت درب الكرامه للنهايه اتواصله

* بالبدور الساطعه للسبط متبرعه

فدوه لحسين

***

من طلع ركْب الامامه ايريد يمشي الكربله صاحت ام عباس يبني ياعميد المرجله

يبني عينك عالعقيله هاي بت عقد الوله اوكون يابدر العشيره ماتعوف العايله

* دونها اتضحي العمر وانته ابن فارس بدر

فدوه لحسين