بدموع الالام يحسين واسوني

من الكوفه للشام يردون يسبوني

وما تحمل الروح كل هاي الجروح

***

خلص عاشر محرم والغبار انزاح بس نيران اشوفن والحرم وصياح

ذاك يصيح طاح وهذا لا ما طاح واصوات استغاثه بكل كتر ونياح

ومن رهبة الجيش اطفالي مفجوعه

والصوره يحسين بعيوني مطبوعه

يا خويه والصار مابين الاخطار

ومن حدر الخيول اطفالي نادوني

***

يخويه اطفال تركض والزلم والخيل وانه من المصيبه منين اجيب الحيل

دم وموت اشوف وبالمخيم ويل وانفض النهار عليه حل الليل

محتاره والعدوان فرحانه بمصابي

وتشمتوا يحسين من طاحوا احبابي

يا نور العيون للغربه يردوني

***

اجيت بهيبتي وبراية العباس يا خويه وغريبه اليوم كلها الناس

غربه وما ألي واحد يشيل الراس غير اهلي واخوتي وصاحب النوماس

يا خويه كلكم وين عفتوني يل غالي

بس الحرم وياي يا خويه تبرالي

والحادي يحسين ضرباته بمتوني

***

احس الكاع تركض والمسافه سهام يا خويه وصفيت بولية الضلام

عفتك بالمنايه بنص حضنها تنام وانه لغربتي مصحوبه بالالام

صحت بعلات الصوت وين اليحامينه

صار الضعن تابوت وايتام ردينه

انخه الميامين ما اضن يسمعوني

***

انخاكم يخويه وروسكم وياي تبرالي واحسها تجاوب لشكواي

محتاره بضعن ايتام شنهي الراي شيردني وحياتي اشلاء من بلواي

ضليتواعالتربان والدم يغطيكم

محتاره يهلي شلون منهو اليواريكم

كالولي مسلوب عرفوا يغيضوني

***

يخويه شلون انسه بالطفوف الصار لو ذيج المناحر والخيم والنار

يتامه خلاف عينك والزمان اندار وبعيده المدينه والحزن جرار

اتمنى اصيح بصوت يا جدي عدوانك

يا جدي شوف شلون مسبيه نسوانك

يا جد يريدون يطفون ايماني