ها يمهدي اشلونك بشهر المحرم

ها يمهدي تجري عينك دمعه لو دم

ها يمهدي بحالتك الله اعلم

ها يمهدي

غايب انته وحاضره بيك الفجيعه مو مدامع جثث بعيونك صريعه

اجه شهر المات ظامي اعله الشريعه تدوي باذنك (الله يا حامي الشريعه)

وابهلالك هلشهر يطعن شعورك

وابهلالك تدعي يتعجل ظهورك

وابهلالك يابشر مثلك تألم

ها يمهدي

يامن جهنم غدت تحلف بنارك وين ماتمشي الحزن يمشي بجوارك

معصب ورايه وعمامه وذ الفقارك كلها صارت تستفزك يمته ثارك

بهليالي وضعك اشبه بالثواكل

بهليالي چنك اتشوف المقاتل

بهليالي هم تشم حرگ المخيم

ها يمهدي

وين تطبيرك يمهدي بيوم عاشر أ برضوى ام طوى تحيي الشعاير

بكربلا قطعاً ولاشك انت حاضر وتركض طويريج حافي براس حاسر

هلله هلله تصيح وين حسين وينه

هلله هلله بالسيوف مگطعينه

هلله هلله يمته يومك يكشف الهم

ها يمهدي

ليش نبضك يضطرب والحاله صعبه سهم المثلث بگلبك لو بگلبه

عالنحر مو علصدر تلطم برهبه من يمر طاري الشمر واثنعش ضربه

بهلمصيبه تحس چنه برجله داسك

بهلمصيبه فصل يم حسين راسك

بهلمصيبه صدره لو صدرك تهشم

ها يمهدي

محرم يطلبك دموع لكل مصيبه مايخلص الا وصفر رايد نصيبه

يگول اريد المهدي يبچي ويشگ جيبه عالتي تنعى منين ابو فاضل اجيبه

راعي غيره والسبي الگلبك يحرگه

راعي غيره تبچي لأجل متون زرگه

راعي غيره بالبچي عمرك وصل چم

ها يمهدي