الظعن يوم الذي اعله السير ولّم غدت عين العليله اتسيل بالدم

غدت عين العليله اتسيل و اتهل و ٱرگد حيلها من سارت البل

أيا حادي النياگ أرجوك دمهل صاحت و الگلب بالنار مضرم

صاحت يا هلي ونّوا ظعينه يمن بٱفراگكم ظلمه المدينه

تره اوياكم دليلي ماخذينه والماخوذ گلبه ٱشلون سلهم

أسلهم چيف يهلي و عيني اتنام و تمر اطيوفكم و ٱحسب بالايام

عليه افراگكم يصبح ألف عام و عليّه نايبات الموت تلتم

عَلَيّ تلتم يخوّاني النوايب يبويه حسين يا نور الغوالب

يعمّاتي و خواتي يا الحبايب تعوفوني و عَلَيّ ليلي ايتعتّم

تعوفوني و ٱذل يحسين ترضون يبويه و تنطفي عگبك هالعيون

جفولي يا هلي قبلٍ ترحلون أودّعكم ٱوداع الموت لو تم

أودّعكم يبويه حسين تاني يريته الموت من گبلك خذاني

عگبكم باللظه و بالهم تراني أظل واشلون ٱظل للنوح مغنم

أظل اشلون وحدي يا شفيه و ٱعاين دوركم وحشه و خليّه

گبل هالساع ٱجت ليّه المنيه يريت و لا جرعت الآه و الهم

يويلي من سمعها حسين ٱجاها حضنها و حيل ظل ينحب وياها

و ٱجت كل الحرم و اشبول طاها و علت يم العليله عبرة الهم

بچت و اتصيح يالسايگ للظعون علَيّ ٱهلي المشوا لا ما يردّون

أودّع ما أودّع كون يرحون و يظل ٱخلافهم ركني ٱمهدّم