ابكعبة احزانك نطوف يا عَليل ارض الطفوف

و زينب الحُرّه ركنها اشصبَّرك تحمل حزنها

* * *

يبو الباقر أبد ما نفتهِم سرَّك عجَز بينه فكِرنه ابشخصك و أمرك

شلِت همّ الطفوف و حزنه ابصدرك و مثِل صبر العقيله ينوصُف صبرك

اتحمّلِت هالإبتلاء كل مآسي كربلاء

و كل شددها و كل محنها اشصبَّرك تحمل حزنها

* * *

مصارع أهلك العالغبره مكشوفه تودِّعمَن تواريمَن منو اتعوفه

و عمّك بالشريعه امگطّعه اچفوفه و گدرْت اتروح اله ابهالحاله و اتشوفه

و جتلك اسكينه ابأنين عمِّي طايح گلي وين

اختك اليتعاله ونها اشصبَّرك تحمل حزنها

* * *

عفه ابصبرك تشاهد عمْتك الحُرِّه إجتلك و الخيم ملتهبه مستعره

تصيح ابن امِّي بالخيل انسحگ صدره يعمّه گوم شدبّر وحدي متحيْره

تدري بيك انته عَليل و دمعِتَك عالخد تسيل

و الدمِع جرَّح جفنها اشصبَّرك تحمل حزنها

* * *

يبو امحمّد گدَرْت اتواري الأبدان و بلايه راس دفنْت المنذبِح عطشان

و تحمّلْت الرضيع لتدفنه بالتربان و رجعْت ابحزنك و همّك إلى النسوان

للحرم عوّد مُصاب و اسمعِت صوت الرباب

تصرخ و تندِب إبنها اشصبَّرك تحمل حزنها

* * *

الحزِن عندك جميع اشكاله وافنونه سفينة نوح گلبك صار يسمّونه

الطشت من شفته و امغطّه يحملونه اصبرِت و اگبال رُقيّه اشلون يخلّونه

صاحت الطفله ابأنين هذه راسك و انته وين

هذي صوره من شجنها اشصبَّرك تحمل حزنها

* * *

خلَص عمرك اعله هالحاله ابنحيب ونوح و بينه اشلون لو شفناك جسد مطروح

عليك اتصيح يا مسموم بينه الروح و نظَل اننوح مثِل نوحك على المذبوح

أبو الباقر منّا راح زيد يا شيعي النياح

و هالمصيبه صيح منها اشصبَّرك تحمل حزنها

* * *