يمحيِّر السَجّان يا موسى أمرك

إنته الصرِت سُلطان يالعالي قدرَك

وين الّذي سِجْنوك وْ وين الظالِم ﻻ ذكِر ﻻ سيره و تذكره الوادِم

وين الصده الِّي چان ايضدّك عارِم حسّب الكُرسي و المُلِك بيه دايم

كل ظالم و غدّار تاليها يهلَك

هذه الحصل و الصار يالعالي قدرَك

أربعْطَعَش عام احمَلِت كل تعذيب فوّضِت بيها أمرك الربّ الغيب

تدري النتيجه ابگصُر عُمْر الترهيب متيقِّن انته التربح و هوّه ايخيب

ما يبلَغ المطلوب من هٰذه سجنك

صبرك صبُر ايوب يالعالي قدرَك

جرِّبَوا كل أسلوب ما أثّر بيك ما تذعن و ما تمِد للذل إيديك

كل ظنهم اﻹغراء يگدَر يثنيك صامد بگيت ابوجه ريح التشكيك

طاهر و ابن أطهار زين و تعرفك

ابشخصك فكرها احتار يالعالي قدرَك

لا رحمه لا رأفه بأيادي السَجّان بايِع حياته و دينه ابأبخَس أثمان

كلما يِنِهْرَك يلگه اتناجي الرحمان لعبادِتَك فَرّغني شِلِّي ابسُلطان

للخالق المعبود ناذرله عمرك

ما همِّتك لگيود يالعالي قدرَك

ما تنزل و ما تخضع الهم شافوك دبّروا غَدْرَتْهُمْ و بالسّم غدروك

بعْد الغدر جثّه ابسلاسل عافوك جابَوا حماميل امن السجِن طلْعوك

حُجّة إلٰه الكون حمّاله التِحِمْلَك

يالغيّبك هارون يالعالي قدرَك

اجنازتك فوگ الجسر من تركوها اجتمعت الناس و جثّتك فحصوها

ناده الطبيب اهل الغريب ادعوها اجنازة إمام الرافضه ايشيعوها

موسى ارتحل مسموم صاح الينِدْبَك

لجلك دمعنه ادموم يالعالي قدرَك