يالذي تواسي الرسول

________________________________________

يالذي اتواسي الرسول إجري دمعك عالبتول

شيَّع الكرَّار بضعة المختار

إجري دمعك عالبتول

***

نَعْش البتول الطاهره للمَدْفَن ابسِر انحمَل

بعْد المآسي و الجره هالليله وافاها الأجَل

و بيا وضع صار الوصي بَس يهمِل ادموع المُقَل

و العتره حگها تنتحِب اعظم مصاب اعليها حَل

ذاكه يهمِل عبرته و هذه يجذِب حسرته

حيْرَت الأفكار بضعة المختار

إجري دمعك عالبتول

***

مظلومه مكسورة ظلِع وابيا سبَب منها انكسَر

منها لمْتون امورّمه وخدها الذي ابچف انسطَر

متألِّمه و منها الصدر يا وسفه بالباب انعصَر

و ظلّت حزينه امألّمه ما چنها بِت خير البشَر

و ظلَّت ابهاذه الوضع تحتمِل كسْر الظلِع

تهمِل الأعبار بضعة المختار

إجري دمعك عالبتول

***

وصّت وصي المصطفى و گالتله يا عَقْد الوله

ابتجهيزي جهِّزلي الچفن و انته ابيمينك فصِّله

و حين الِّي نعشي اتشيِّعه دَفني يحيدر اجِّله

من هَدوَة الليل التجِن جسمي ابحفُرته اتنزّله

إنته تعلم بالسبب امن التي صبّت حطب

وعلنت استنكار بضعة المختار

إجري دمعك عالبتول

***

نزَّلها حيدر باللحِد بِمسافَح امواج الدمِع

و اتوجّه الصوب النبي وايگله گلبك ينفجِع

يالهادي ردَّت بضعتَك و الونّه منها تنسمِع

من كل ألم من كل هضُم ردّتلَك ابكسْر الضلِع

ناقمه و متألّمه تشكي عِدْ رب السمه

تكشف الأسرار بضعة المختار

إجري دمعك عالبتول

***

عفَّه الگبُر ما ظل أثَر و الشيعه ظلَّت حايره

لَرض البقيع التعتني توگف حزينه امحسّره

تسمع صده اونين الضلِع و يتنطّر الِّي ايجبُّره

يمته يحِل يوم الفرَج ابلهفة گلب متنطّره

يمته يوم المُنتظَر يگطع ايد الِّي جسَر

و اهوه ياخذ ثار بضعة المختار

إجري دمعك عالبتول

***

رضا عبدالعزيز

٢٠٠٨م