كَالولي بسَّكْ دَمعْ

كَالولي بسَّكْ دَمَعْ موخافْ تِعمَه العينْ

كَتلهُم اطفي الجّمُرْ والدّمع هوّ الدَّينْ

منْ ابجي طول العُمرْ ما أوفي حق احسينْ

كَالولي بَسَّكْ حزنْ يكفي بعَدْ ياصاحْ

كَتلهم اسمه الفَرحْ من أحَزنْ آنه ارتاحْ!

الحسين هو الأمَلْ ول كل قُفُلْ مِفتاحْ

كَالولي بسَّك لَطُمْ تلطُمْ اسنينْ اشْصار!

كَتلهُمْ ادمي الصَّدرْ مهما جَرالي اوْصارْ

احسينْ هو الذُّخرْ اوبايدَه يطفيّ النَّارْ

كَالولي بسَّكْ مَشي ماتتعَبْ ابمَمْشاك!

َكِلنهه اونكَولْ اوْبَعدْ بأرواحنه نِفْداكْ

المِشه ابيادهْ إله يلكَه الشَّفاعَه اهناكْ

او كَالولي بسَّكْ توِنْ ونَّه اعله ونَّه اتموتْ!

كَتلهُم ْاللّي يِوِنْ ابحسينَّه مَبخُوتْ

صَكْ مِنْ علي والده للجنَّه بيه ايفوتْ

اوكَالوْ اوكَالوْ بعدْ الشِّيعه تره ايغالونْ!

خلِّصوْا كلّ العُمرْ اينوحونْ ويلطمونْ

كل مَلكْ بل كل نبي بعالي السّمه يبجونْ

الحسين من النّبي هالرُّوحْ مِنْ هالرُّوحْ

من نحره شَمّه اوبجه يدري تره مَذبوحْ

بسْ دمّه ثوره يظلْ لكل ثائر او مَجروحْ

لاءك تظلْ سيّدي من اعظم اللاءاتْ

او ثورتك يابن الوصي نبراس للثوراتْ

شما رادوا اوحاولوا ما كدروا او هيهات

يطفون نور المَجدْ والعزّة والإيمان!!

اسمكْ ابلوح العرش امسجّل من الرحمنْ

او ثورتك يابو علي لكلّ البشرْ عنوانْ

يلضمّدِتْ كل جرحْ واجروحك انته اهوايْ

او روّيت كل الظمه او مشربت انته المايْ

لبّيكْ ياسيّدي لبّيك امولايْ

حضرتك جنة تظل بيها الملاك اتدور

واهمومنه تنجلي من نطب ليها انزور

الحسين من فاطمة نور انولد من نور

يامن جِدتْ بالنّفسْ يابو الكَرمْ والجودْ

ثورتك ضد الكفر اوضد الليالي السود

باجر يهل الكَمر ينادي انه الموعود