شنهو الأعذار التلوذ بسورها لو نفخ صوت العداله بصورها

ياحجج تنفعها بعد وياعذر لو ظهر غايبنه واحتد الأمر

من جبينك يقره أسرار الفكر وما يظل خافي أبد مستورها

لاخداع الينفع ويا لاهروب ولاتظم عنه سرايرها الأگلوب

ماظن الماتايب ايلحّگ يتوب لو تنصّب للحرب دستورها

لاتفيد أعذار لاتنفع حجج لو ينادي الصوت هاحل الفرج

وشفت الأمطهّم تحضّر وإنسرج وأعلن برفع اللوه مامورها

تبطل بجيته جميع الباطلات وتشتغل كل النفوس العاطلات

والجفون اغيوم تصبح هاطلات شي حزينه وشي تهل لسرورها

وجّه اعيونك على حِلّ الرصد وخلّه ايمانك على گلبك مصد

والله لو بالأينعت سيفه حصد اتشوف چويت حيدر اعله نحورها

اتوجّه وأدّي فروضك واستريح واگصد بدمعه لعد گبر الذبيح

خل يصدّق اعمالك بطبت الضريح زيارته اتضوّي القيامه بنورها

لاتغمض العين عالحل والحرام وانته الأتشّرع حلالك عالمرام

إعمل وخلّي على صفحه الكلام يكشف ألواح الچذب ناظورها

لاتنافق بالحچي ولاتستغيب وارسم بعينك محطات الغريب

نحر دامي وجسد عالغبره سليب صوره تكشف آل أميّه وجورها

حزّم أمرك واحتزم بالغانمه اخدم اخدم وإلعن الضَد فاطمه

خل ابو اليمّه يقيّدك خادمه ولاتفوتك كربله وعاشورها

بخدمة حسين وشعايرها النجاح ايلبسك المهدي لون يظهر وشاح

وحضرته الجنّه وزيارتها الفلاح تربح الدارين حين اتزورها