( محراب الهموم )

شلون ليله الوحشه ترمي احرابها بگلب زينب من تحل إرچابها

الليله زينب بالفواجع والنياح الليله شبل المصطفه بميدانه طاح

أمست بحزن المواجع تستراح وبرحه الهم انصبت محرابها

وبرحه الهم ودواير وحشته ظلت اتلوج العقيله بساحته

بين اخوها الطايح بسد حومته وبين الأيتام التدور احبابها

بين الأيتام واخوها إلّي انصرع ولوعة الخدّر لمن سمعن وگع

انصابن وسهم الجفه اعليهن فزع وليها متعني الگلبها وصابها

ليها متوسط الگلب صاب السهم وعالآلم جرح الگلب صبّ والتحمّ

ويا آلم يبعد على فيض الآلم وهيه لجروح النوايب بابها

هيه للهم والحزن قبله أصبحت بچتلت حسين وحيادتها إنسبت

بالظعن عگب الچفيل اتوزّمت والصبر دنّج يحب أعتابها

والصبرهامه انحنه البحرالصبر وأگبل بعرشه لعد زينب يجر

خلّدت آية صبرها الكل عصر بليله حته الليل نفسه ايهابها

بليله بيها الحزن متولي الحشه غربه وأيتام ومصارع مدهشه

ليله بالوحده اعله زينب موحشه وتحرس اخيمها العده واحزابها

تحرس اخيمها العده بليلة حزن والگلب بين الفواجع ممتحن

ساعه التهيّد صدر ليله اليونّ وساعه التواسي الرباب امصابها

ساعه التواسي وتهيد بالجرح وتلتفت ساعه وتحشّم المنذبح

شلون بعيالك لون طرّ الصبح وألوت النوگ اعله سبي ارگابها

وألوت النوگ الرگاب اعله السفر ولوّح ابراياته يحسين القهر

يا هو اليبارينه وايرد الخطر وانته بالحومه وأسير اترابها

انته بالحومه وصريع اعله الطفوف والگمرفوگ الشريعه بلا چفوف

وانه بين اجروحي والوحشه أطوف والليالي اتحد عليّه انيابها