ابگلب مالوم...اجيت اليوم اعزي هادي العتره

تنوح الزهره والدمعه على الخدين تنادي كسّروا بويه إلي ضلعين

يبويه هالمصايب مدري جات امنين انعمت عيني وسگط مني اعز اجنين

واضل انعي... واهل دمعي وگلبي ماطفى جمره

يشيعة حيدره منهو اليواسيها جرح صدر البتوله والله ماذيها

عانت والعدى ماحنوا اعليها ياليت السطره جات إلنه ولا ليها

جرح المصاب... على الأعتاب طفلها طاح بالغبره

شلون أًمه ارجعت تالي على الأعقاب تخون اوصيت الهادي شنو الأسباب

وطفل الزهره ياشيعه على الأعتاب وگع لمن رفس هالطاغيه للباب

وبگت هالنار ... تشب بالدار تزيد اللوعه والحسره

على امصاب البتوله شبّ جمر همي وينحب للوديعه كل عضو جسمي

وأنا كلما صحت دمعي غدى يهمي ولجلها ينهدم والله ركن عزمي

على أم احسين ... اجر اونين وبگت نيراني مستعره

ادفنوا المحسن يويلي والدمه اخضابه وبگت أم الحسن مفجوعه لغيابه

وهضم فگد الطفل ليها الگلب صابه وهيهات الگلب يتحمل امصابه

كثر ونها ... الحزن فنها وضلعها ما انجبر كسره

متى الغايب يگوم اويأخذ ابثاره وتشع مثل الشمس مهدينا انواره

ولنا گبر الزچيه يكشف أسراره ولبو اليمه يروح الكربلا ازياره

وعلى الحاير ... الجفن ساهر ننوح ونجري العبره