عصمة النبي وآله صلى ألله عليه وآله

«هجري»

خمسه المحمد والعلي المعبود منطيها

علمه او قدرته اوحكمته او رضوانه

الباري إنطه الهادي خمسه او خمسه منطيها العلي

غيرهم ما ملك منهن لانبي ولا وصي

ونحل حيدر بربع أشياء اومعناهن خفي

وهاالأربعه ابنص الخبر باللوح سرهن ما ظهر

عالملك والجن والبشر حيدر ابها المعنه افتخر

بفتخر حيدر بالنبي وللأمه بكفيها

وفضل الأشياء الأربعه ابحيدراو عنوانه

غاص عگلي ابلجج فكري ايريد منجه المذنبين

شاهدت آية الكبره ابفضل سيد المرسلين

« وما أرسلناك إلا رحمة للعالمين »

وها الآيه من نص الوحي تشهد ابتفضيل النبي

معناها ظاهر موخفي وامة محمد تكتفي

آية الكبره بالنبي تزهر معانيها

نور او تجلت ساطعه بالنبي او برهانه

ابناظر البي شفت باري الكون طالعت الكتاب

ابحثت عن آية العصمه او عگلي ابدالي الجواب

گلي العصمه إرادة اصدرت من رب الأرباب

من فم القدره صادره اختصت لهل سيد الوره

العصمه بإراده امصوره من التقدس جوهره

والعصمه جوهر بالنبي صورها باريها

وعالبيت واهله اموزعه ابتأويل قرآنه

عگلي او فكري تحاكم والحواس امحكمين

ومستشار الهم دليلي المهتدي ابنور اليقين

قررت لي هالمحاكم معنه قرآن المبين

القرآن للعالم رشد بمنهج محمد منفرد

ناداني عگلي من تصد ابناظر الإيمان اوتجد

القرآن روح او بالنبي للخلگ يهديها

حكمه او مواعظ جامعه للثبت إيمانه

صرت أفكر ( بالولايه ) وخضت بحر الاجتهاد

عگلي ناده اشبيك تايه آنه أدليك الرشاد

الباري ابعقد الولايه طوگ ارگاب العباد

معنه الولايه من الأزل ونص الوحي بيها نزل

الدين ابمعانيها كمل (حي على خير العمل)

معنه الديانه بالنبي والنص شهد بيها

وسر الولايه او مرجعه ( الحيدر ) اوبرهانه

عگلي ناشدني اعلى فكري ايحوم شنهي رادته

گتله رايد اسم الأعظم شنهو سره او علته

گال هذا الاسم مختص بالإله او قدرته

من القدره هل سر مظهره وبيه الأمور امدبره

اختص ابمحمد مصدره والباري خصه ( الحيدره )

سر اسم الأعظم بالنبي كل حاجه يگضيها

وعند الأمير امودعه سيطرة سلطانه

فكري اوعگلي تحاكم عن معاني الأصفياء

فكري بآدم تبصر فضله اعله الأنبياء

عگلي ناده فضل آدم أرض والهادي سماه

آدم انقبلت توبته ابسر الرسول او عترته

لمن خرج من جنته للباري وجه دعوته

آدم توسل بالنبي او عترته او طاريها

فضل إبراهيم فكري مستدل ابها الدليل

گال هذا النجه من النار اوبنه بيت الجليل

جاوبه عگلي ابمحمد صار تأييد الخليل

إبراهيم بالهادي اقتده والولد أيد والده

إبراهيم حصل مگصده بالبيت لمن شيده

والكعبه گامت بالنبي او شادت مبانيها

واثبت حجرها ابموضعه والبيت واركانه

نوّر المعبود گلبي وانكشف عني الستار

استكشفت برج المعاني الغامضه او برج الأنوار

دورت نور التجله او موسى ظن بالنور نار

للنور لمن دورت بإيمان گلبي اتبصرت

ابسراعتقادي حصلت غايتي اوبالغايه انجحت

والنور شفته بالنبي كل حكمه يحويها

والحكمه آيه ابطالعه او أيدت ثعبانه

للمسيح اندار فكري واستحج ابحجته

يبرئ الأكمه والأبرص يحيي ميت ابحكمته

جاوبه عگلي ابمحمد عيسى صار او آيته

عيسى ابمحمد مبدأه تأيد وثبت منشأه

عيّن العيسى بارئه يصير المحمد ملجئه

من راد عيسى بالنبي النفسه ينجيها

الرابع سمه الباري ارفعه او شبه العدوانه

كل نبي ولك وصي اتأيد منهجه المصطفى

ومن عگب عيناه وافوا عترته ابسوء الوفه

والحسن من جرح سمهم بالطشت جبده اقذفه

وما رعوا لحسين أمة الهادي

من بگه ابلا عون ضامي وينادي

من العطش نيران حمست افادي

بالنبي للگوم يحلف بالنبي والگوم چن ماتسمعه

جاوبوه الگوم لاچن بالحجر دون الأفواه

صك جبهته او فاض جرحه وانصبغ شيبه ابدماه

رفع ثوبه اومسح دمه ولن سهم حامي إجاه

والسهم لحسين مرد دلاله

رمل اعياله او يتم اطفاله

وعين جده اعليه بگت هماله

بالنبي والسهم جرحه بالنبي ومن ظهر سبطه مطلعه

والتوه من اصواب گلبه او طاح ساجد للمجيد

من حدر راسه وساده يجمع اتراب الصعيد

ينادي ياربي ابسبيلك راح محبوبك شهيد

ضعف حيل حسين شدة اصوابه

ومنصرع وجروح جسمه سچابه

ماسوه الباري حن على امصابه

بالنبي والحزن عجج بالنبي والعرش ماج ابمصرعه

مغشي اعلى احسين والگوم بأمره اتحيرت

منها گالت بيه روح او منهم إلگالوا گضت

ابن سعد ناده الحرايب عالمخيم هاجمت

شاهد اعياله حسين منهوبه

صاح هالنسوان بيش مطلوبه

اترملت خل عاد تظل محجوبه

بالنبي راعوها بالله او بالنبي خلوا الفواطم هاجعه

اشلون گومه الگام بيها حسين من وجه الثره

ايگوم ويطيح اوجبينه أمن التراب امعفره

استند بالسيف او توجه للمخيم ناظره

للفواطم صاح لاتروعوها

نار فوگ النار لا تزيدوها

عالمتن بالسوط لا تضربوها

بالنبي هالسوط أثر بالنبي والمتن زينب لوعه

ساعد الله حسين چم نار البگلبه مضرمه

ابكتر نار السهم تسعر وابكتر نار الظمه

وغدت بموسط دليله تشب نار امخيمه

منصرع والخيل هشمت صدره

رضت اضلوعه واسحنت ظهره

والسهام البيه چنها بالزهره

بالنبي او كل هالمواضي بالنبي والجسمه چنها اتگطعه