حوار العقيلة والزهراء (عليه السلام) بعد الرجوع إلى المدينة

يُمْه الأمانه نَفَذِتْ يا زهرة الآل أرد اخبرچ باللي جرى واشكي لگ الحال

رديت و الأحزان تخفق فوق راسي بعد اللي شفته يُمْه من ضيم و مآسي

جيت المدينة منْ السفر وين اليواسي قلب اللي شافت كل مصايبهم و الاهوال

جيت اخبرچ باللي جرى يُمه يا زهره ابنگ يا يُمْه من بقى محزوز نحره

للأعوجية خلّوا الميدان صدره تصعد و تنزل و ابنگ معفر بالرمال

يُمْه و بعد فوق الرمح شالوا كريمه و حرقوا خيامه و روعوا يَمْه حريمه

و من قربوا هزّل لنا صحنا هضيمه بانت الذّله بهالسفر وينك يا سردال

ساقوا الضعن بعد المعزه هالاعادي يا زهره يُمه و شهّرونا بكل وادي

حسرة على هزّل و ساترنا الأيادي سلبوا مقانعنا و قادونا بالحبال

طبّينا للكوفة و قلنا الذل جدام و الضعن بس بيه الحرم وعليل وأيتام

و شالوا بنا لأرض المذلة بلدة الشام و الناس تتفرج علينا ويّ الانذال

يُمه و تعدى شُلتْ ايده من تعدى يضرب ثنايا ابن النبي و محّد يرده

كسّر اضراسه بالعصا و ليّه تحدى و آنا ضعيفة و مقدر ادفعها هالافعال

يُمْه الخرابه زادت احزاني عليّه من تنطري أتذكر الطفلة رقيه

ماتت يا يُمه و جددت لينا الرزيه بغربة دفناها يا حسرة مالها رجال

يُمه يا زينب لا تعدين المصايب بعيني شفتْ كل الرزايا و النوايب

لكن مصاب حسين خلى الراس شايب صبري يا زينب عالذي جاري من اهوال