على مصاب الزچيه نون ونه خفيه

بگلب ذاب وتفطر على الضلع التكسر

نون ونه خفيه

بعد ما غمض الهادي الگوم اندارت الأشرار

ورادت تاخذ البيعه من حيدر علي الكرار

واضح والخبر معروف يوم الهجموا أعله الدار

انكسر للزهره واتهشم ضلع بالعصره والبسمار

وتكفكف دمعها

من كسروا ضلعها

تنادي الحگ يحيدر على الضلع التكسر

نون ونه خفيه

الگوم المارعوا حرمه للهادي وعليها أتلوح

للزهره أجوا للدار بهذا الدار ما مسموح

غير الوحي وأهل البيت محد ما يجي ويروح

كسروا باب هذا الدار وخلوها تون وتنوح

تبچي كل عمرها

وشيصبر صبرها

تصبره شلون تگدر على الضلع التكسر

نون ونه خفيه

بعد الشافته الزهره يوم الهجموا أعليها

محتاره تصد بالعين تريد اللي يحاميها

وطه الحيدر أموصي وصيه وملتزم بيها

چان بلحظه يگدر هاي كل الگوم يفنيها

تدري بهالوصيه

واتحملت أذيه

ونار البيها تسعر على الضلع التكسر

نون ونه خفيه

حزنها المحد أيحمله بصبرها اتحملته وحسره

ونار التسري وسط الروح وتسعر بالگلب جمره

على المحسن تصب ادموم وتنحب فاطمه الزهره

النواصب طيحوا المحسن وطفوا شمعته وعمره

وگع ينزف جنيني

شلون تشوفه عيني

بحزن گلبي تمرمر على الضلع التكسر

نون ونه خفيه

بعد هالواقعه الزهره عليها كثرة اللوعات

صفت كتلة حزن والنوح ميفارگها والدمعات

ما عرفوا قدرها الناس أذا هو الضمير و مات

نبقه بهل حزن أحنه ومنبطل حزن هيهات

عليها بكل حزنه

نون عالزهره ونه

وننادي الله وأكبر على الضلع التكسر

نون ونه خفيه