تشييع الأمير (عليه السلام)

بِدْموع الليله اتعنّينه يا وسفه الْحامي الجار

وانريد انشَيّع والينه وابنعشه انهلّ اعبار

لنّ اجينه الكوفه واحنا نسﭽب العبره ونهلها

ونعتني الْدار الإمامه انسلّم ابحسره اعلى اهلها

ومن وصلنا ابهالمدامع شفنا عيله اتصُبْ مُقلْها

عيله محتاره وحزينه وتايهه الفرﮔةْ بطلها

ملتمّه العيله ابحسرتها ولنْ تبﭽي اعلى الكرار

واحنا اللي انشارك دمعتها وابنعشه انهلّ اعبار

شفنا أيْتام اعلى حيدر تبﭽي واتفطّر كَلبها

وحفّت ابدار الإمامه وشبْحت انظار ابدربها

واحنا لنّ اوﮔفْنا يمها وننحب انصيح ابكَرُبها

وعنْ ولينه انشدنا وسفه هامته منهو الخضَبْها

يمْ بيت الوالي اتجمّعنا واتلُوح النا الاكدار

ومصيبة حيدر تفجعنا وابنعشه انهلّ اعبار

ضجّت الكُوفه ابأهلها من خبر موتة ولينه

واحنا يم داره اجتمعنا ننتظر حيدر يجينه

كلْ أملنا يبﮕى سَالم ويطلع ابأنواره لينه

سَاعه لنّ ابنعشَه أهله يا وسَافه شَايْلينه

كلْ منّا اتحيّر بمﭽانه من طلعت هالأطهار

واتشيل الوالي ابأﭼفانه وابنعشه انهلّ اعبار

شفنا نعْش الوالي ﭼنّه المصطفى الهادي ايْتِشيّع

وشفنا طُود امْن المآسي تنحمل والكل تصدّع

إلْعلم والحكمه صَارَنْ جُثّه وايْواريها مضجع

والذُّهُول اتجلّى بينه وبسْ نحيب العيله نسمع

أَمْلاك الليله اتشاركنا بمصيبة حامي الجار

والهَمْ مَا يوم اللي اتركنا وابنعشه انهلّ اعبار

اطْلعنا ويّه العتره نحمل نعْش ابُوها الوالي حيدر

وكلْ مدامعنا ابغِيابه دَمْ صُفتْ هالليله أحمر

عجبه يتوذّر ولينه (مَنْ فتح بحسامه خيبر)

واغْدره الفاجر وسَافه ونهتف اب اللهُ أكبر

كبّرنا ابموتة حَيْدَرنا وتِدْوِي الصّرخه ابكل دَار

واحنا ابهالحاله اتفطّرنا وابنعشه انهلّ اعبار

شلنا أعواد ابهضمنا ويّه أشْبال الإمامه

والحسن وحسين ناحوا عالأبُو الماتَمْ صِيامه

جينه وانساعد ﮔمرنا من ﮔضى ابساعةْ تمامه

وزينب الوالدها حيدر ﭼانت اتريد السلامه

زينب مفجوعه ابواليها واتجارتْ دمعةْ نار

واحنا ابوالدها انواسيها وابنعشه انهلّ اعبار