لو تسأل كل شيعي ايجاوب...دمعه السجاب

حاضرنه اليبين أثر ماضينه...وايخبرك امن امصاب اشجره اعلينه

صبحنه المخلص القابض على دينه...مثل جمرة غضه وقابضها بيمينه

وبهذا الحال...عاشت أجيال

من تقره التاريخ ايخبرك...عن الأسباب

لو تسأل كل شيعي ايجاوب...دمعه السجاب

لو رايد حزنه تعرف أسبابه...ودمعتنه عليهن دوم سجابه

الخانوا بالجليل وهجروا اكتابه...وظلموا عترة المختار بغيابه

منهم لوعات...شفنه ونكبات

ما ظن اسهام الصابتنه...تنعد بحساب

لو تسأل كل شيعي ايجاوب...دمعه السجاب

ننسه اشلون حقنه الضايع المغصوب...لو ضلع الزجية الطاهرة المصيوب

لو شيب الوصي بدم هامته المخضوب...لو جبد الحسن لو جثة المسلوب

من الظلام...صابتنه اسهام

والسهم القاسي اليتمنه...سهم المحراب

لو تسأل كل شيعي ايجاوب...دمعه السجاب

وصاهم وقالوا يهجر المختار...وبليلة وفاته وخذلوا الكرار

ودفعوا عالوديعه البضعة باب الدار...وسنوا ظلم ضد آل النبي الأطهار

راوونه اجروح...من عدها ننوح

يا جرح الجتال البعده...ينزف ما طاب

لو تسأل كل شيعي ايجاوب...دمعه السجاب

شذكر يا مصيبه الما تشيب الراس...من اذكر بني أمية وبني العباس

وناس أبشع فعلها بالظلم من ناس...أعرض إلك صورة تالم الإحساس

بين البلدان...تلقه البرهان

كل واحد مدفون بصفحه...العتره الأطياب

لو تسأل كل شيعي ايجاوب...دمعه السجاب

السامره اعتني وركز بشوف العين...تلوح من بعيد الناظرك قبرين

ودمعك من شعورك يهل عالخدين...وإنشد ليش بالسم قطعوا جبدين

الهادي المعصوم...وابنه المظلوم

من أشرف سادات الأمه...وخير الأنساب

لو تسأل كل شيعي ايجاوب...دمعه السجاب

علي الهادي الإمام الينصف اليعدل...والجده الرسول بسيرته يمثل

اشلون بموقفه ييأيد المتوكل...و الرغبته وحكمه ايطاوع وينزل

عاين شختار...سبط المختار

صرخة حق بوجه الظالم...وبجبده انصاب

لو تسأل كل شيعي ايجاوب...دمعه السجاب

المتوكل ابحقده وموقفه معروف...يوم القال من يقصد حسين ايطوف

حق ازيارته ايكلفه ذهب واجفوف...صاحوا ما يهمنه لو قصدنه ازحوف