تصرخ حميده اشعدها ....... راح الأبو من يدها

لا تنتظر والدها

*

هذي حميده الطاهره بت مسلم و معروفه

ودعها والدها و مشه راح و قصد للكوفه

ظلت تناطر شوفته ابمهجه و نفس مشغوفه

يا مصعب افراق الأبو تتمنه يوم اتشوفه

محرومه محرومه ....... امن الوالي محرومه

ثقل الصبر ضاهدها ....... و لا من خبر يسعدها

لا تنتظر والدها

*

من شد أبو اليمه الظعن و اتوجهوا بالمسره

فرحة حميده ابها الخبر و بها السفر مبتشره

كالت أروح الوالدي و اهناك عيني اتنظره

و أشكي له همي و حيرتي قلبي الجزع من صبره

مالومه مالومه ....... و المهجه مالومه

هالطفله جان ابودها ....... اتعيش السعاده ابسدها

لا تنتظر والدها

*

طلعت حميده اويه الركب و الحادي بيهم طوح

من هودج العفه بقت صوب الدرب تتشبح

طفله و لعلها امن الأبو رجوت وصل تتلمح

ما تعلم اشيخفي القدر و شراسم إلها المذبح

مرسومه مرسومه ....... يا حاله مرسومه

اعيوني الحزن ترصدها ....... بالفاجعه اتواعدها

لا تنتظر والدها

*

ما بين ما بالباديه هاي الرواحل تسعي

لن فارس إلهم يتجه يصيح ابنحيب و ينعي

يحسين ابن عمك كضه و أنعاه إجيت ابدمعي

بالكوفه سحبوا جثته و ما زال صوته ابسمعي

و ادمومه و ادمومه ....... تتسافح ادمومه

لو عنده طفله اكصدها ابجف العطف مسدها

لا تنتظر والدها

*

من قبل ما يبدي الخبر بين الهل يتنقل

حست حميده باليتم و الدمعه فتحت منهل

قامت عله اوجوه الأهل ابنظرة حزن تتأمل

يا هو التشوفه اتناشده عن حال أبوها و تسأل

مهمومه مهمومه ....... هالطفله مهمومه

جم نايبه اتكابدها ....... هضم الدهر كايدها

لا تنتظر والدها

*

سكنه و رقيه اتناوحن هالطفله زايد همهن

ما يدرن ابطف كربله هالنايبه اتيتمهن

ايشوفن ابوهن عالثره عالشاطي جثة عمهن

و ايشوفن الأخوه جثث عالأرض نازف دمهن

مضرومه مضرومه ....... و الخيم مضرومه

طفله تظل وحدها ....... بس الصبر يسندها

لا تنتظر والدها