يَقْلبي يصَابِر ... عَليِمْن تِكَابِر

بعدْ لِيلةْ وِحْده...و حَبِيَبك يِهْاجِر

اشْيطَيبْ جِراحَك ... اويْه طَلعْت صْبَاحَك

حَبِيَبك يِهْاجِر

يَريتْ يطول ليلي والنَجِم يطفَح

شِلي بمصباحي ريتْ الصُبح لا صبّح

الصُبح تِبدي المَدامِع عالأهْل تِسْفح

إذا جَمْال أهلنا بالضعن طوح

أنصحك بالصَبُر يا قلبي المْجَرحْ

صُعوبَة بهَالوﮔت تِلقْى الذي ينصَح

بِدتْ نايباتي تِقُرب وفاتي ...وأبوي اللي أودّه أعزْ من حَيْاتي

يِهْيج نِياحَك ...أويه طلعت صباحك

حَبِيَبك يِهْاجِر

شحْلاتَه العُمرْ لُو ظْل والدي يَمِي

إذا يتركني يتركني لثقل هَضْمِي

جِنتْ أقعدْ ويَاه بيقْظِتي وحلمي

يقلي يا سِمْا الفرحة وسِحْر نجمي

إمن اشوفج أفرح وينزاح كل هَمِي

إسمج فاطِمة وإسمج إسم امي

يقلبي بخيالي تِطُوف الليالي ... أبوي وحَبِيبي شكُثر عندي غالي

رَاوْحه وروْاحَك ...أويه طلعت صباحك

حَبِيَبك يِهْاجِر

شعَلامك يا قلب تتصيد الأحزان

وتعثر بالنبض وتسلدك الضلعان

أبويه اهناك وأشوفك ناحل وذبلان

اشيصبر حالتك لو سارت الركبان

شكثر ضيم وقهر شايل يبو الأشجان

تكابر عل الهضم يا فاجد الخلان

إعله فرقت خليلك مصايب تجيلك...ما ينفع يا قلبي نداك وعويلك

إشنفعك صياحك ... أويه طلعت صباحك

حَبِيَبك يِهْاجِر

اشكثر يا قلب من أيامك تحاذر

على حروف التمني عايش وصابر

يريت يظل أبويه اوياي للآخر

بلا جلمة يبويه عنج مسافر

يريت وياه أروحن لمن يهاجر

بلا دمعة وداع و كسرة الخاطر

يا قلبي وأريدك تعاين بعيدك ... وأظن حتى صبرك بعد ما يفيدك

تصيبك رماحك ... أويه طلعت صباحك

حَبِيَبك يِهْاجِر

فجر باجر يبادر والدي لممشاه

وكل العيله تتبعه ومسراه

بعد ما يبقى والي ولا سند أرجاه

حتى اللي بالمهد يرضع يروح اوياه

أظل آنه وحيدة مرافقتني الآه

أناحب بالقهر وبلهفة الويلاه

بلهيب انتظاري يموت اصطباري ... يشيعك يا قلبي طيور البراري

يتكسر جناحك ... أويه طلعت صباحك

حَبِيَبك يِهْاجِر

إذا شد الرحال وهاجر الوالي

ألف حسبه تمر باجر على بالي

أشوف البيت يصفى من الاهل خالي

واقوم اذكر وجه كل غاليه وغالي

واقولن جانت اهنا سكنة تبرى لي

اهنا جانت رقية تقعد قبالي

هلي اللي اودهم تظل روحي عندهم ... إذا فارقوني أموتن بعدهم

يموت انشراحك ... أويه طلعت صباحك

حَبِيَبك يِهْاجِر

ابرمش عيني انسجت جلباب أحزاني

سقيت الممحي بدمعات أشجاني

عسى جفوف المصيبة تخيط أجفاني

قبل هالسفرة ريت الناعي ينعاني

وآخر جلمة بيها ينطق لساني

أموت ولا أودع ضعن ولياني

جمر حزني هايج وأصد للهوادج ... عليله بمصابي أنازع وأعالج

أتخيب طموحك ... أويه طلعت صباحك

حَبِيَبك يِهْاجِر