غير الجفوف عله الماي عله الماي

إتذكر إوياي...يالتشرب الماي

علي السجاد آني يالتنشدون

تره إبهاي المصايب تعمه العيون

أنا بعد الأحبهم أصبر إشلون

هلي راحوا هلي و لا ما يرجعون

جرحي ما طاب أويلاه أويلاه

بعد الأحباب أويلاه أويلاه

و الجمره بحشاي....يالتشرب الماي

هلي كلهم عله الرمضه عفتهم

و أنا إبجمر المدامع غسلتهم

بجه حته الصبر من ودعتهم

شفت زينب أسيره و عاتبتهم

دارت العين يعباس يعباس

عاين حسين يعباس يعباس

حرمتني دنياي....يالتشرب الماي

أبد ما ينحمل ضيم الحملته

أنا ذباح أبويه إقبالي شفته

سلب عمتي و خواتي و ما منعته

يويلي و من شتم زينب سمعته

حامي الضعون أناديه أناديه

يسكت إشلون أناديه أناديه

مقطوعه يمناي....يالتشرب الماي

يظل منظر حزن بالعين مطبوع

شفت راس الحسين إبرمح مرفوع

و أشاهد منحره و خنصره المقطوع

و أنا و سكنه سمعنه كسر الضلوع

روحي تفديك يعطشان يعطشان

دمعي يرويك يعطشان يعطشان

مصيوبه عيناي....يالتشرب الماي

أنا شفت العجب بالغاضريه

و الأصعب من شفت زينب سبيه

أشاهد راس أبويه إيصد عليه

يقلي يا علي سّكت رقيه

ظلت إتنوح عله الراح عله الراح

راحت الروح عله الراح عله الراح

هاك إسمع بجاي....يالتشرب الماي

إجه وكت الفرض و إشلون أصلي

شفت سكنه إجت و الدمعه تهلي

تيمم فوق راس إختك تقلي

إنمله راسي تراب إبغيبة أهلي

شفت التراب عله الراس عله الراس

أصبح إحجاب عله الراس عله الراس

يا ويلي من هاي....يالتشرب الماي