حيدر حيدر ...من صوت أبو طالب سمعناها

حيدر حيدر ...أربع حروف إبعينه شفناها

بفراق أبو طالب بجه طاها النبي و أصحابه

واضح عله إعيونه الحزن فارق أعز أحبابه

غابه و يظل فوضه الوضع لو غاب ليث الغابه

و التعبد اللآة و هبل فرحانه من إغيابه

رايه رايه...رايتنه و بزودك رفعناها

رايه رايه ...هاي العلي و شخصك تمناها

ليش الحقايق تنقلب و المسلم إيكفرونه

هذا أبو الرد الشمس بس مشرك إيسمونه

ما يبتعد عن النبي سيف و يدافع دونه

سيد العرب كل العرب و الواجب يرفعونه

آيه آيه ...رتلها حيدرنه و كتبناها

آيه آيه... آية عشق و إحنه العشقناها

إنت لأن إبنك علي باعوك بيع الذمه

بس الحرق باب النبي عدهم صحابي إتسمه

هالأمه ما تسوه العتب ميت ضمير الأمه

و إنت يوالد حيدره قمه و تظل بالقمه

عالي عالي... فوق النجم هالكلمه معناها

عالي عالي... و الغيره من عدكم أخذناها

إنت الدرع للمصطفه من الزمن و أخطاره

إنت يمن كلك علي لكن بلا فقاره

أشرف نبي يتذكرك من ينظر الكراره

تبقه البحر و بهيبتك و إتخافك البحاره

غالي غالي... كلمة شرف و إحنه الحجيناها

غالي غالي ...حبك فريضه و ما تركناها

لعيونك إنظل عالعهد مهما يصير إويانه

و اللي يمسك سيدي و الله نقص إلسانه

إحنه السيوف الما تذل بالموزمه تلقانه

ما ننسه إحنه و نعتقد حيدرنه ما ينسانه

والي والي... هالكلمه بالدم إشتريناها

والي والي... بعنه النفوس و عيب بعناها

الربته هند إبحقد غير الحقد ما عنده

أكلت جبد عم النبي و إتغذه من الجبده

صاح إبها مشرك للعظم و الناصبيه إتمجده

و إتقول أبو سفيان إجه و النبي صافح يده

وينه وينه... راونه جذبه و ما قلبناها

وينه وينه... يرويها بن هند و رفضناها

يالناصبي المثلك يظل أخرس و لا يتكلم

معقوله والد حيدره أشرك و أبوك الأسلم

إنت و أبوك و زمرتك من هالرجل تتعلم

هذا الشرف كل الشرف يالبشرف ما تفهم

يبقه يبقه... أعظم قضيه و ما نسيناها

يبقه يبقه ...و بعالم الذر إيده بسناها

يالناصبي أحسن إلك تبقه إعله طبع إيزيدك

إيدي أقصها من المتن لو مره لمست إيدك

و إعيون أبو طالب أظل ضدك و أبد ما أريدك

خصمك علي يوم الحشر و إنشوف منهو إيفيدك

باجر باجر ...ساعة حسابك و إنتظرناها

باجر باجر... منهو اليعبرك لو عبرناها