دارك تحيي الخطار...قبرك ملاذ الزوار

كرم عندك...مثل جدك...قبرك ملاذ الزوار

واجب علينه إزيارتك يا من ضريحك جنه

شيعتك إحنه و عالعهد كل عام إلك نتعنه

الفجرت قبرك تعتقد منك قطعنه الظنه

غلطانه ما تدري إشكثر موت إبشرف نتمنه

لمن لفتنه الأخبار...للوسف هلت أنظار

الدمع يشهد...يبو محمد...قبرك ملاذ الزوار

عندك كرامات و حكم يصعب علينه إنعدها

ابحضرتك كل يوم اليمر يا سيدي إنشاهدها

إنت الطبيب الشيعتك إتشافي الجروح العدها

معروف فضل إزيارتك و للمنبعد تقصدها

إزيارتك يبن المختار...بيها النجاة من النار

العرف قدرك...و قصد قبرك...قبرك ملاذ الزوار

الما عدها إيمان و صبر دوم إبضعف محتاره

من صاحت إشلون الرضه سفكوا دمه زواره

لو عنده شاره إبها الوكت لازم يبين الشاره

و شارتك وضحت كالشمس و إنت بن حامي جاره

الباعت الدين إبدينار...إنفضحت إبذلها و بالعار

البخت ذلها...و ثبت إلها...قبرك ملاذ الزوار

منكم تعلمنه الصبر من ضيم العليكم جره

من كسر ضلع الطاهره و جتفوا جدك حيدره

و من صوبوا جبد الحسن و حسين حزوا منحره

و إبخيلهم صدره إنهشم و مسلوب جسمه اعله الثره

و بالسبي راحت أطهار...و بالشام أظن تدري إشصار

الصبر حكمه...و ثبت رحمه ...قبرك ملاذ الزوار

من بني العباس إشكثر واجهت مولاي إهموم

عن وطن جدك غربتك شاهد تظل يا مظلوم

يبن الزجيه إبيا ذنب جبدك تقطع مسموم

و شيعتك هالليله إبحزن يم قبرك إبلوعه إتحوم

إبعلمك هديت الأفكار...غدرتك وسفه الأشرار

و شهد علمك...على حلمك...قبرك ملاذ الزوار

يا باب حاجات الذي قبرك تجي إبحاجتها

يالرضه و حاجة شيعتك بلجت تفك غربتها

حنت القبر المرتضه و تشجي إلك لوعتها

يا يوم ترجع للوطن تقصد علي إبدمعتها