قلعه يا آلَ محمد للصمود...موسه بن جعفر يذل صبره القيود

موقف أجداده يعيده...حته قيده إيقبل إيده...طيبين طاهرين طاهرين

حسب إيمان الذي إبجفه القيود...فكرته و نيته و جهاده و غايته

إبلا عقيده الذله عالخايف تزود...من يجتفونه تبين ذلته

لا عقيده إيدافع إلها ولا عهود...و لا عزم سيف الترس جف يمنته

أكو إجفوف إتشوفها رمز الصمود ...عد علي حامي الحميه و عترته

و الإسود إشما تجتفها إسود...عالقيود إبنبع غيرتها إتجود

شاهد الحق و شهيده...حته قيده إيقبل إيده...طيبين طاهرين طاهرين

علي من بيته السقيفتهم خذوه...إمجتف إبحبل الوصيه إجفوفه

لأن يوفي العهد حيدر جتفوه...و ظل شمس كل عين نوره إتشوفه

القيد بجفوف الصميده كبلوه...و لأن القيود أصبحت مجتوفه

جتفوا إجفوفه علي و صبره نسوه ...إنتصر صبره إبمحنته المعروفه

إبدين أبو القاسم بقه يزهي الوجود ...إبفضل حامي الجار وفاي العهود

إنظر الشبل الصميده...حته قيده إيقبل إيده...طيبين طاهرين طاهرين

موسه بن جعفر قيوده إلنا دليل...و صوت ثوره من السجون إيمثله

بيه ننظر صورة إجتاف العليل...نشر بقيوده نهج طف كربله

صار صبر النوق من صبره دخيل...و صار تالي النصر بالثوره إله

و الدهر و القيد يم زينب ذليل...مثلما ذلهم علي عقد الوله

أخذ منها الدروس و الماضي إستعاد...و أعلن إبقعر السجن فرض الجهاد

وفه و إيمان و عقيده...حته قيده إيقبل إيده...طيبين طاهرين طاهرين

الكوفه مسلم شوف خلاها تموج...و خله كرسي الحكم و الحاكم ذليل

الخيل ظلت بالدمه الينزف تفوج ...سيف من إسيوف حماي الدخيل

عالقصر و إقيوده من عزمه تلوج...و شيد الروحه قصر ظنوة عقيل

مثل كوخ الكاظم السجدت له توج...ذهب أصبح نوره للتايهه دليل

روح إسأل شوف بغداد إشتقول...عن بدرها اليشع بأنوار الرسول

رمز للحق و نشيده...حته قيده إيقبل إيده...طيبين طاهرين طاهرين

ويه بن جعفر ربه إسنين الصبر...و إنتصر صبره إعله ظلم إقيوده

إبغربه عنده اويه السجن عِشرة عمر...أطعم إقيود الحديد إزنوده

يا إمام الشوفته بزغت فجر...ما نضب باب الحوائج جوده

إسمك الظل صرحه بوجوه الكفر...سجنوا و إبظلمه و غربته إشهوده

قبتك يزهي ذهبها يا شهيد...ريت كون إيشوفها اليوم الرشيد

موسه يسجد له حديده...حته قيده إيقبل إيده...طيبين طاهرين طاهرين

صاح محراب الحزن بإسمك جهاد...و إنت ساحة معركه محرابك

و صرخ صوت الغربه يا سيد العباد ...هلت إدموع الصبر يم بابك

قاضي الحاجات يا باب المراد...إلك مدت هالأيادي أصحابك

أعلن القرآن بمصابك حداد...الكون ناح إبهالمسه لمصابك

الليله نتوجه نزورك من بعيد...الليله حسن العاقبه إبجاهك نريد

الضحه لله إبدم وريده...حته قيده إيقبل إيده...طيبين طاهرين طاهرين