يموسى النجد موسى من سحر فرعون

وكل أمر اليهم الكون بيك إيهون

يجسم الكائنات إو روح جسم الكون

يا نون التكوين إو كافه

ببرهان الزبور وللصحف تمثيل

يبهجة خاطر التوراة وألإنجيل

يالسان الوحي إو يا منطق التنزيل

يا سر المحفوظ إبلوحه

گاصدلك إو من (إسهام علتي) شچاي

دهري نحل جسمي ونخب عظمي الداي

أريد إدواي منك يالتعرف إدواي

يالكاظم تدري إشمگصودي

گاصدلك وروحي الدهر مرمرها

وأريد المعسره إبوجهي تيسرها

وسفن حاجاتنه شلهت دسيرها

يمسير نوح إبطوفانه

گاصدلك شريد إبگصدي تدريني

أضمد جرح البساقك الماذيني

وأطفي جمرة السم إبدمع عيني

من گلبك يا ماي إعيوني

گاصدلك وكسرة خاطري وياي

عله إمصابك ومن عيني تفيض إچلاي

وسم إللي شربته جمرته بحشاي

وإتگص إبگلبي وسباحه

گاصدلك إو جرح السلسله يدي

وسم إللي مرد چبدك مرد چبدي

مثل وجهك إبوجهي سطرة السندي

وإبسجنك تتگلب روحي

گاصدلك وأهيس بالگلب چانون

يوِّج من سطرة السندي وظلم هارون

روحي إوياك وآنه إعله الجسر مرهون

عد نعشك محنيه إضلوعي