ما عندك ذنب حقهم يعادونك لأن والد علي رادوا يكفرونك

إنت أول شخص عاشر نبي الرحمه و خاويته ابعلي الكرار ابن عمه

يشعر باليتم لو إنت مو يمه نصير المصطفه الهادي يسمونك

يبو طالب عتبنه إعله الزمان إشلون يخلي أهل الدجل عالعتره يتمادون

وسفه إعليك كافر سيدي يقلون و إنت الما يتم الدين من دونك

إحنه إشلون نسكت و الحجي إنسمعه يا دين الإله و منهجه و شرعه

لحد آخر نفس درب إبنك إتبعه عندك ناس آية حق يشوفونك

خطيت البدايه و إحنه ما ننساك نحيه إنموت يا عم الرسول إوياك

ما شاع العدل لو ما كرم يمناك يالشايل حنان الهادي بعيونك

يا أول شراره الهزت الطاغوت إثلث إسنين صابر ما تهاب الموت

يا مهيوب صوتك أعله من كل صوت حير الأعادي إشلون ينهونك

صبر عندك عظيم و ما تحده إحدود يا راهب زمانك بالكرم و الجود

و يالعندك عطف و إحسان ما موجود بيش الناس هالليله يوافونك

عهدنه إوياك الحد آخر نفس بينه شوق التضحيات أصبح ينادينه

شيعه و بالمصاب اليوم عزينه و أتباع الوصي إبدمهم يواسونك

لو ما إنت جان إتهدم الإسلام و جا ظلت قريش إتمجد الأصنام

حرست الدين كله إبعينك المتنام و تكبر بالفجر كلما يضدونك