بلوعتها و حزنها .... حضرت يم ابنها

حزينه فاطمه اليوم .... غدت يم الرضه اتحوم

حضرت يم ابنها

***

مثلما حضرت و شافت ابنها الحسن حين انسم

و مثلما شاهدت بالطف وريد احسين ينزف دم

تعنت للرضه الزهره و حضرت بالنحب و الهم

تشوفه اينازع بروحه و تكطع جبده و اتخذم

و بجمرة كسرها .... طلعت من كبرها

بدمع يتسافح ادموم .... غدت يم الرضه اتحوم

**

تكله يبني هاي آنه الوديعه فاطمه أمك

إجيتك من أرض طيبه لرض طوس احضرت يمك

إجيت و شفتك اكبالي تلوج بنايبة سمك

يبني و من شفت هالحال تذكرت الحسن عمك

و اتفطر جبدها .... من ذكرت ولدها

بكلب يتناثر اهموم .... غدت يم الرضه اتحوم

***

جفنها اعله الرضه اتناثر جمر جن مو جفن بركان

تكله يا غريب الدار بدار الغرب موتك حان

موأول غريب إنته كبلك جدك العطشان

ولوه بكربله و أصبح غريب الأهل و الأوطان

لوعات و مصايب .... آهات و نوايب

ذبيح و هذا مسموم ....غدت يم الرضه اتحوم

**

تنوح اعله الرضه و تبجي تحن بنت النبي المختار

غدت مثل الحمامه اتحوم اعله جثة عاشر الأطهار

انعادت كل مصايبها و ذكرت دفع باب الدار

مثل سم الرضه و ناره غدت تدوي بكلبها النار

كل جمرة بعلامه .... شتفيد الملامه

عكب ما تركت اللوم .... غدت يم الرضه اتحوم

***

تكله يالرضه بفقدك جمر بحشاي وجرته

يبني و كلكم اولادي و كل اللي كضه احضرته

لبوك الكاظم اتعنيت و بذاك السجن زرته

و يوم اللي لفاه الموت أحس بمهجتي ادفنته

بهالحاله الحزينه .... جيت من المدينه

بحزن عالمهجه مرسوم.... غدت يم الرضه اتحوم

**

ضحايه و كلكم اولادي فرق ما عندي يا الأولاد

أحن اعله الحسن مره و أحن مره اعله ابو السجاد

و عالصادق و عالباقر و أنوح الزينة العباد

و مره أبجي على الخلوه مرهون بسجن بغداد

يا آخر بنيني .... هاك اسمع ونيني

المدامع جنهن انجوم .... غدت يم الرضه اتحوم

***