شيعه و لازم بإخلاص نؤدي اليوم واجبنه

نطبق نهج أهل البيت و انسر قلب غايبنه

أهل البيت منهجهم ما بيه ريب لا منقص

الباري فرض طاعتهم قادة اعتينوا بالنص

ابفكرهم يهتدي التايه و من اوهامه يتخلص

و اعله الدين و الإسلام ياهو الغيرهم أحرص

آمنه ابشريعتهم .... و ابمعتقد فكرتهم

نفخر إحنه شيعتهم

ابعلمه الباري علمهم و من عدهم تعلمنه

إحنه أمه مظلومه و مثل أمتنه يا أمه

قبل جان اليعرفونه شيعي ينهدر دمه

و كل حاكم لعب فد دور و صب حقده بلا رحمه

و ما طاوعنه كل ظالم رغم بطشه و رغم ظلمه

صرنه الماي للعطشان .... و احنه القوت للجوعان

رفضنه الظلم و الطغيان

و هذا مذهب أهل البيت بالواجب يطالبنه

و من يوم الغدير البيه اتنصب حيدر الكرار

و مظالمهم بدت تظهر من مات النبي المختار

و من يوم التمسكنه علينه جارت الأشرار

لأن قلنه نعيش أحرار و نموت ابها الدرب احرار

السجون اترست بينه .... اشكثر أرواح ضحينه

و كلما نملك انطينه

مظلومين و الها اليوم محد رد مظالمنه

رغم كل الظلم و الجور ما بايعنه كل ظالم

الواجب لازم انأديه و انأدي حقوق هالوادم

الحكم للباري و أهل البيت و نرفض احنه كل حاكم

للحاربهم انحارب و للسالمهم انسالم

و من كل رجس طهرهم .... و بأنواره نورهم

بأحسن صور صورهم

أهل البيت قدوتنه و بس إلهم صبح حبنه

مو بس لقلقه بإلسان صلاة اللي نصليها

و لازم تنهه عن فحشاء و عن منكر نخليها

و نفسنه اعله حب الخير يوميه نربيها

إلنه و العلينه اليوم هالجلمات نحجيها

لمن نقرأ القرآن .... نطبق واجب الرحمان

و لازم من قلب و إلسان

و مو بس نعتني بالصوت و نترك ما أمر ربنه

الشيعه لازم اتطبق كلما ورد بالأعمال

الباري ايقول و أهل البيت ما ينفع فقط أقوال

العداله من نطبقها و نوصل غاية الآمال

علي اشقال العقيل المن بيت المال راد المال

و الحق لازم انحقه .... و إحنه أول انطبقه

مو جلمات عالورقه

الساحات العمل ننزل و انطبق تجاربنه

نسعي و السعي إلنه لمن نعمل المعروف

نعين اليعتني ابحاجه و نرد لهفة كل ملهوف

من اتشوف لك مظلوم عينه و لا تظل مجتوف

للحق لا تظل واصف بيه إنت انجعل موصوف

الشيعي قدوه و ابكل حين .... عله أهل البيت يصبح دين

ما يصبح عليهم شين

و المعروف لو عفناه تتكاثر مصايبنه

ادروس احسين قدمها كتبها من دمه نحره

من طف كربله موقف لازم ناخذ و عبره

لازم احنه باليقظه نشوف احسين و انظره

مو بس بالحلم ننظر كرامات و كثر صبره

هذا احسين أبو اليمه .... اشتره دم شيعته ابدمه

ما بايع أبد خصمه

و احنه من أجل حبه تعذبنه و تغربنه