يا مسموم جينه الدارك صرنه اليوم من زوارك

ذكراك يالكاظم تعيش اويانه لليوم نحمل لوعة السجانه

زوارك احنه سيدي و انعاهد مبدأنه يبقه اوياك مبدأ واحد

جسر الأيمه اعلينه أوضح شاهد لزيارتك ضحينه حته ادمانه

يا من عشت بين السجن و الغربه عانيت أهوال السجون الصعبه

يا الكاظم و منك ورثنه النكبه شفنه الظلم و الجور يا مولانه

شيعتكم احنه و نسحك اعله الأخطار عل الموت نمشي و جينه يمك زوار

ميهمنه كل اللي جره اعلينه و صار و انظل انواصل بالدرب ممشانه

جسر الأيمه يسأل ايريد اجواب هالفاجعه اللي صارت ابيا أسباب

للعالم انفضحت رموز الإرهاب هذي بقايه امن الحكم و أعوانه

جسر الأيمه اختفت كل أحبابي الله يلعن كل رجس إرهابي

ذبح اخوتي و كل هلي و أصحابي و اعله الهويه ننذبح خلانه

فاجعة هذا الجسر من نتذكر فاجعة سجنك سيدي نتصور

نجري دمعنه اعله الجره نتحسر انشارك ضمير العالم باحزانه

اجنازتك فوق الجسر من خلوها نفس الأيادي الحادثه ارتكبوها

ابنفس المكان الشيعتك غدروها جددوا حزن امصابك و أشجانه