لرض الكاظميه يا غريب القوم جينه الشوفتك عود الرضه المظلوم

إجينه الشوفتك منا الدمع سجاب و السجنك إجينه و دقدقينه الباب

داريك إمامي و نفحت الأطياب اطلعت امن مولاي ابهذا اليوم

اطلعت امن السجن ثاري يركن الدين إجينه الشوفتك للجسر متعنين

أويلي اشلون شفنه امغمض الجفنين و شبل الصادق و منه الجسم مسموم

و لن ابن النبوه و مهجة الزهره و اسنين انقضن بالسجن من عمره

غريب اتحمل ابجاس الصبر أسره اعيونه اعله العقيده امحاربات النوم

و رغم اعله العده سطر اعله الظالم و للأمه الأمانه و عالعهد دايم

من احسين عزمه و جن قمر هاشم قاوم للظلم يدري الظلم ميدوم

عله الكاظم بجيت و هلن الدمعات و هيهات الفرع ينسه الأصل هيهات

و ننسه اشلون دجره و بالقلب لوعات و عنه بعدونه العادوا المحروم

أنسه الروح و ما أنسه شبل جعفر و نيران المحبه بمهجتي اتوجر

و حته الموت تبقه للأبد تسعر من عنه رموني اتفجرت لهموم

عله الكاظم دموع العين هماله نشجي اعله البعد و الروح مياله

لضريحه انتعنه و نشرح الحاله و انقله القلب عقبك غده مجسوم

و مجسوم القلب لجلك غده نصين عنك هجرونه و تدري عن احسين

فرقنه الزمن ما عدنه غير البين نشوفك و الوعد يا سيدي محتوم